Viral na ‘Philppines’ tarps iimbestigahan

Naglunsad ang ASEAN ( Association of Southeast Asian Nations) 2017 National Organizing Committee (NOC) ng imbestigasyon sa kontrobersiyal na tarpaulins na ikinabit sa iba’t ibang bahagi ng Maynila bilang pagsalubong sa foreign delegates ng 31st Summit ng regional bloc.

Naging viral sa social media nitong nakalipas na mga araw ang mga litratong kuha sa tarpaulin na mali ang baybay ng “Philippines”, na naging “Philppines”.

Ayon kay Presidential Communications Operations Office (PCOO) Assistant Secretary Kris Ablan, iniimbestigahan na ng NOC kung paano ito nangyari lalo na at ang naturang mga tarpaulin ay hindi tumutugma sa inaprubahang layout.

“We are currently investigating the circumstances surrounding the distribution and display of the subject tarpaulins or billboards,” sabi ni Ablan na sinipi sa official statement ng NOC.

“The exact tarpaulins or billboards pinned in the areas leading to the Mall of Asia (MOA) complex did not conform to the approved final artwork,” dagdag niya.

Ayon kay Ablan, ang ASEAN 2017 Committee on Media Affairs and Strategic Communications ay bumuo ng brand guidelines at sakop ng inaprubahang final artwork ang dapat gamitin sa buong bansa.

Inihayag din ng PCOO Assistant Secretary for Policy and Legislative Affairs na ang mga tarpaulin ay hindi inimprenta o ipinamahagi ng PCOO, ng Metropolitan Manila Development Authority, ng Department of Public Works and Highways, ng Philippine Information Agency, o ng Tourism Infrastructure and Enterprise Zone Authority.

“The DILG-NCR (Department of Interior and Local GovernmentNational Capital Region) already issued a statement (that) clarified that it was issued by them, it was posted by them,” sabi ni Ablan. “They already took them down and that they are replacing those posters with (the) correct spelling of the country, (the) Philippines.”

Umaabot sa 20 lider ang inaasahang dadalo sa 31st ASEAN Summit at East Asia Summit (EAS). Kabilang sa mga ito ang mga pinuno ng 10 ASEAN member-states at ang United States, China, Japan, South Korea, India, at iba pa.

Kahapon, dumating na sa bansa sina Cambodian Prime Minister Hun Sen at Myanmar State Counsellor Aung Sang Suu Kyi.

Kumpirmado ring dadalo sa ASEAN Summit sina US President Donald Trump, United Nations Secretary General Antonio Guterres, Brunei Sultan Hassanal Bolkiah, Indonesian President Joko Widodo, at Lao People’s Democratric Prime Minister Thongloun Sisoulith.

Dadalo rin sina Malaysian President Najib Razak, Lee Hsien Loong ng Singapore, Prime Minister Prayut Chan-O-Cha ng Thailand, Prime Minister Nguyen Xuan Phuc ng Vietnam, at Chinese Prime Minister Li Keqiang, Australian Premier Malcolm Turnbull, Canadian Prime Minister Justin Trudeau, European Council President Donald Tusk, Indian Prime Minister Narenda Modi, Russian Premier Dmitry Medvedev, Korean President Moon Jae-In, at New Zealand Premier Jacinda Ardern.