Iloilo solon kinasuhan ng graft
Kinasuhan ng graft si Iloilo City Rep. Geronimo Buenaventura Treñas, dating alkalde ng siyudad, sa Sandiganbayan Seventh Division dahil sa umano’y anomalya sa konstruksiyon ng Iloilo Press Club (IPC) building.
Sa dokumentong isinumite ni Assistant Special Prosecutor III Jorge B. Espinal, inakusahan si Treñas ng paglabag sa Section 3(e) ng R.A. 3019 nang magbigay siya ng “unwarranted benefits, advantage or preference” sa halagang P500,000 nang pinayagan niya ang konstruksiyon ng IPC building.
Galing ang pera sa Priority Development Assistance Fund (PDAF) ni Senator Loren Legarda. Pumayag ang dating alkalde sa memorandum of agreement kasama ang IPC para sa konstruksiyon ng gusali sa Barangay San Pedro, Molo, Iloilo City.
Inakusahan ni Espinal si Treñas ng paglalabas ng pondo para sa IPC kahit na hindi ito accredited non-government organization ng lungsod.
Maaari siyang makapagpiyansa ng P30,000.