KIDS-SOS, laban ng batang Pinoy
MULA sa basic, kailangan ng mga batang atleta na magamit ang mga natutunan sa sports seminar at clinics upang tuluyang mahubog ang kanilang kaisipan at talento sa sports na naaayon sa kanilang pangangatawan at kagustuhan.
Ito ang layunin ni Philippine Sports Commission (PSC) Commissioner Arnold Agustin sa inorganisang 1st Kabataan Iwas-Droga: Start on Sports sa Theresian School of Cavite sa Bacoor City nitong weekend.
“Ang mga participants natin dito yung mga batang nakiisa sa ginawa nating sports clinics and seminar under the Children’s Game program ng PSC. Yung natutunan nila sa clinics ay mababalewala kung wala namang tournament na lalaruan kaya kami naman sa pamahalaan ay handang tumugon dito,” pahayag ni Agustin.
Kabuuang 14 na eskwelahan sa elementarya at high school sa lungsod ang nakiisa sa programa na suportado rin ng Theresian School of Cavite, Department of Education (DepEd) at Bacoor City Mayor Lani Mercado- Revilla.
“Nag- focus muna kami sa tatlong sports – table tennis, badminton at chess. Madali kasing iorganisa ang mga sports na ito dahil hindi masyadong nangangailangan ng equipment at walang problema sa venues. Our technical officials are provided by DepEd, with the help of national sports association,” sambit ni Agustin.
Kabilang sa nakibahagi sa programa ag Bacoor National High School (Molina Main), Zapote Elementary Schoo, BNHS – Tabing-Dagat, Mabolo Elementary School, Aniban ES, at Niog ES.
‘We want the kids to use their free time in worthwhile activities – be fit and healthy, have them focus on sports rather than taking part in negative activities,” pahayag ni Agustin.
Kabilang sa inihalintulad na dapat maging modelo ng kabataan sina chess Grandmaster Wesley So at badminton star Sarah Jane Barredo.
. “Ito po talaga ang pangarap ko, gamitin ang badminton para makapagtapos ng pag-aaral,” pahayag ng isang participant na si Angelo Bajamudin ng Molino High School.