Torre, nakaamba sa World Seniors tilt
NADOMINA ni Filipino Grandmaster Eugene Torre si International Master Hernan C. Van Riemsdijk ng Brazil sa ika-10 round ng 27th World Senior Chess Championship 2017 (50+ and 65+ Open-men and women) nitong Sabado sa Acqui Terme, Italy.
Bunsod ng panalo, nakakolekta si Torre ng kabuuang 7.5 puntos para makasosyo sina top seed GM Anatoly Vaisser ng France, GM Evgeny Sveshnikov ng Russia, GM Vlastimil Jansa ng Czech Republic, GM Lothar Vogt ng Germany at IM Arkady Shevelev ng Israel sa 65 and over division.
Ginapi ni Vaisser ang kababayan na si GM Vladimir Okhotnik, nagwagi si Sveshnikov kay dating solo lider Jansa, naungusan ni Vogt si FM Christoph Frick ng France, habang nakihati ng puntos si Shevelev kay GM Evgeni Vasiukov ng France.
Sa ika-11 at final round, makakaharap nmi Torre si Vaisser sa Board 1, magtutuos sina Sveshnikov at Arkady sa Board 2 at maglalaban sina Vogt at Jansa sa Board 3.
Ayon kay Philippine executive chess champion Atty. Cliburn Anthony A. Orbe, sumusubaybay sa torneo sa live streaming ngchessbomb.com, kumpiyansa siyang maiuuwi ni Torre ang kampeonato.
Matapos ang 10 round, wala pa ring talo si Vaisser tangan ang limang panalo at limang draw, habang si Torre ay may pitong panalo, isang draw at dalawang kabiguan.
Galing ang 66-anyos na si Torre sa kampeonato ng 2017 Asian Senior Chess Championships sa Auckland, New Zealand.
Samantala, tumabla si Filipino GM Rogelio “Joey” Antonio Jr.,kontra GM Giorgie Bagaturov ng Georgia matapos ang ika-26 moves ng Sicilian para makopo ang 7.5 puntos at masisosyo kay GM Zurab Sturua ng Georgia, nagwagi kay IM Oliver Brendel ng Germany sa ika-23 moves ng English Opening.
Target ng 55-anyos na si Antonio, pambato ng Calapan, Oriental Mindoro, ang top 5 finihs sa kanyang pagsabak kontra IM Spartaco Sarno ng Italy sa final round.