Bagong remake ng ‘Meteor Garden’, mapapanood sa ABS-CBN
KILALANIN ANG BAGONG F4
NAKUHA ng ABS-CBN ang rights na ipalabas ang gagawing remake ng China sa phenomenal hit idol drama na Meteor Garden na minahal nang husto at tinangkilik ng Pinoy fans at siyang nagsimula ng asianovela craze sa bansa. Sa press conference na ginawa noong Huwebes (Nov 9) sa Shanghai, China, pormal nang ipinakilala ang mga bagong miyembro ng F4 na sina Dylan Wang, 19, bilang Dao Ming Si; Darren Chen, 22, bilang Hua Ze Lei; Connor Leong, 23, bilang Mei Zuo; at Caesar Wu, 21, bilang Xi Men.
Ang baguhang aktres na si Shen Yue naman ang napili para gumanap bilang si Shan Cai.
Ayon sa orihinal na producer ng Meteor Garden na si Angie Chai, napili ang cast batay sa kani-kanilang mga personalidad na kahalintulad sa F4 ng Taiwan.
Hunyo pa lang ng taong ito ay puspusan na ang paghahanap ng producers sa cast at nagsagawa ng auditions sa mga prestihiyosong unibersidad sa Taipei, Hong Kong, Singapore, Los Angeles, at China. Mahigit 30,000 applications at resumes ang natanggap nila mula sa mga nais mapabilang sa F4.
Nang tanungin kung ano ang inspirasyon sa likod ng panibagng produksiyon ng Meteor
Garden, ibinahagi ni Angie na tadhana ang nagdala sa kanya rito pagkaraan ang 15 taon. Ito na rin umano ang pagkakataon niya para tapusin ng tama ang kuwento na naayon sa orihinal na manga na Hana Yori Dango. Tampok sa Meteor Garden ang kwento ng simpleng si Shan Cai na makakabangga ang sikat at mayayamang kalalakihan sa school na kung tawagin ay Flower 4 o F4.
Sa ABSCBN unang napanood ang orihinal na Meteor Garden na pinagbidahan ng Taiwanese actor na si Jerry Yan. Dito na nagsimula ang Meteor Garden fever sa Filipino fans.
Pagkaraan ng anim na taon, buhay na buhay pa rin ang pagmamahal ng mga Pilipino sa F4 dahil sa tagumpay ng Korean remake na Boys Over Flowers na ipinalabas din sa ABS- CBN. Sa naturang KBS-produced drama nailunsad sa international stardom ang Korean actor na si Lee Min Ho na binansagang King of Asianovelas sa bansa.
Mananatiling tahanan ng Meteor Garden sa Philippine television ang ABS- CBN sa pagpapalabas nito ng Chinese version sa 2018.