3 bangkay sa hiwalay na kalsada sa Caloocan

Patay na nang matagpuan ang tatlong lalaki, pawang ginilitan, sa magkakaibang lugar sa Caloocan City, nitong Miyerkules ng madaling araw.

Habang isinusulat ang balitang ito, hindi pa alam ang pagkakakilanlan ng tatlong lalaki na ang isa ay ipinagpapalagay na menor de edad.

Ayon sa imbestigador na si PO1 Dorald Cuyangoan, ang dalawang lalaki, kapwa inilarawang nasa edad 20- 30, ay nakasuot ng stripe t-shirt at asul na short pants habang ang isa ay nakasuot ng stripe t-shirt at gray pants, na natagpuan ng isang Grab driver na bumaba sa kanyang sasakyan upang umihi sa northbound lane malapit sa General Mascardo Street sa Barangay Bagong Barrio, dakong 3:20 ng madaling araw.

Kapwa sila ginilitan habang ang isa sa kanila ay kinabitan ng cardboard na may nakasulat na “Lugar namin ito, ‘wag kayo dito, susunod na kayo Oca, Giboy, Jerome, Carlo, Intsik, Sylex, Daboy, Roniel,” ayon sa awtoridad.

Isang witness ang nakapagsabi sa mga imbestigador na ang dalawang lalaki ay madalas mamataan sa Balintawak market sa Quezon City.

Makalipas ang sampu minuto, isa pang katawan ng lalaki, na ipinagpapalagay na teenager, na nakasuot ng puting sando at asul na short pants, ay natagpuan din sa Dagat-Dagatan Extension sa Bgy. 28, dakong 3:30 ng madaling araw, sabi ng imbestigador na si Mark Julius Pajaron.

Ayon kay Pajaron, ginilitan din ito gaya ng dalawang lalaki sa Bagong Barrio.

Ayon sa mga residente, hindi tagaroon ang lalaki.

Sinabi ni Pajaron na base sa closed-circuit televison footage, isang sasakyan ang huminto malapit sa lugar kung saan natagpuan ang bangkay, dakong 2:45 ng madaling araw.