1M Pinoy nakinabang sa ‘Angat Buhay’
Umabot na sa isang milyon ang bilang ng maralitang Pilipino na nakikinabang sa flagship antipoverty program ni Vice President Leni Robredo na “Angat Buhay,” batay sa huling datos na nakuha ng Balita.
Nakasaad sa accomplishment report mula sa Office of the Vice President na naabot ng poverty alleviation projects sa ilalim ng Angat Buhay ang 774,448 indibiwal nitong Disyembre 4. “Since VP Leni took her oath, she has consulted with over 80 communities nationwide,” ayon dito.
Bago matapos ang taon, sinabi ng OVP na pinalawak ng programa ang naabot sa kabuuang 176 lugar sa buong bansa, na pinakikinabangan ng 90,000 pamilya.
“Through the different modes of engagement… the OVP and its partners were able to mobilize P176,359,178.33 worth of resources,” saad sa ulat.
Mahigit isang taon matapos ilunsad ni Robredo ang Angat Buhay, patunay ang mga natamo ng OVP na ang papel ng kanyang opisina ay hindi na ceremonial lamang kundi tagasulong adbokasiya.
Sa anti- poverty program, iniuugnay ng OVP ang mga pribadong kumpanya at nongovernment organizations (NGOs) sa iba’t ibang lokal na sangay ng pamahalaan tungo sa pagpapabuti sa buhay ng mararalitang pamilya.
Nitong Oktubre, opisyal na inilunsad ng OVP ang livelihood arm ng programa – ang Angat Kabuhayan, na naglalayong pagkalooban ng kabuhayan at trabaho ang maliliit na sektor.