Pension applications , 2 taong tinulugan –Marquez
Tumestigo si Supreme Court Administrator Jose Midas Marquez sa House impeachment panel na simula nang nilikha ang Special Committee on Retirement and Civil Service Benefits at dalawang technical working groups noong 2015 at 2016, walang survivorship pension applications na inaksiyunnan sa loob ng dalawang taon.
Sinabi niya na kahit na nilagdaan nina Chief Justice Maria Lourdes Sereno, Associate Justices Antonio Carpio, at Presbitero Jose Velasco Jr. ang paglikha sa special committee, ang pagtatag ng TWGs ay solong direktiba ni Sereno. Ang unang TWG na naglalayong salain ang mga application ay inistablisa noong Disyembre 22, 2015, habang ang ikalawang TWG at itinatag noong 2016.
“After the committee was created, umabot na sa dalawang taon baka madesisyunan ang application,” ani Marquez sa House Committee on Justice sa ikalimang pagdinig sa pagtukoy sa probable cause kung dapat o hindi dapat i-impeach si Sereno.
“From October 2015 to November 6, 2017, no application was acted upon, more or less mga two years, one month and five days po yun,” aniya.
Sinabi niya dahil sa napakarami niyang natanggap na kahilingan para bilisan ang paglabas ng pension benefits ng judges at justices, lumiham siya kay Sereno noong Enero 12, 2017 “[to] treat the matter immediately.”
Sinabi niya na natanggap ng opisina ni Sereno ang liham nang araw ding iyon, ngunit hindi ito inaksiyunan.
“Wala pong nangyari, walang sagot,” aniya nang tanungin ni Pampanga Rep. Juan Pablo Bondoc kung kumilos si Sereno sa liham.
Nang tanungin ni Quezon City Rep. Quezon City Rep. Vincent Crisologo kung ang pagkaantala sa paglabas ng pension benefits ay dapat na isisi sa court en banc at hindi kay Sereno, sumagot si Marquez na, “puwede natin alam kung saan natutulog.”
Sa kanyang impeachment complaint, inakusahan ng abogadong si Larry Gadon si Sereno na inantala ang paglabas ng survivorship benefits kay Dolores Colayco, ang biyuda ni CA Justice Jose Colayco.
Binanggit din niya ang itinalagang abogado ni Sereno para mamuno ng TWG na may hawak sa pension at survivorship benefits na si Atty. Jocelyn Fabian.
Dahil dito, naglabas ang panel ng subpoena kay Fabian para obligahin siyang dumalo sa pagdinig ngayong araw( Disyembre 6).
Sinabi ng kampo ni Sereno na walang “illegal” at “anomalous” sa paglikha ng dalawang TWGs.
“At nais din namin linawin na ang desisyon patungkol sa mga application for retirement benefits ay hindi lamang ginagawa ni chief justice alone. Supreme court en banc po ang nagdedisisyon,” diin ng ng tagapagsalita ni Sereno na si Atty. Josalee Deinla.
‘SHUT UP’ GADON
Kinastigo ng mga mambabatas kahapon si Gadon at sinabihan siyang manahimik at iwasang maglabas ng mga walang basehang alegasyon na makakaapekto sa integridad ng impeachment proceedings at paninirang-puri sa Senate impeachment court.
Tinawag ni AKO BICOL partylist Rep. Alfredo Garbin Jr. ang atensiyon ni Gadon kaugnay sa mga alegasyon nito na mayroong “oligarch” na nagbabalak suhulan ng mga magiging senator judges ng P200 milyon para iabsuwelto ang punong mahistrado.
“I advise Mr. Gadon to keep his mouth shut if he cannot verify his claims,” aniya sa pagdinig ng House panel.
Ipinanukala din niya na i-cite for contempt si Gadon sa mga sinabi nito. Inutusan ni Oriental Mindoro Rep. Reynaldo Umali, chairman ng House Committee on Justice, si Gadon na magsumite ng paliwanag sa loob ng limang araw kaungnay sa mga alegasyon nitong panunuhol sa senator-judges.
Nag-demand pa si Garbin ng apology mula kay Gadon kung hindi nito mapapatunayan ang kanyang mga alegasyon.
Sinita rin si Gadon ni Antipolo City Rep. Romeo Acop at Quezon City Rep. Vincent Crisologo.
“Atty. Gadon, please shut up your mouth, para hindi mapasama ang proceedings dito,” sabi naman ni Crisologo, na sumang-ayon kay Garbin na dapat i-cite for contempt si Gadon.