ABS-CBN, nanguna pa rin noong Nobyembre
ABS-CBN pa rin ang pinakatinutukang network ng mas maraming Pilipino sa buong bansa noong Nobyembre sa naitala nitong average audience share na 46%, kumpara sa 34% ng GMA, ayon sa viewership survey data ng Kantar Media.
Hindi nagpadaig ang Kapamilya Network sa bawat parte ng bansa, partikular na sa Mega Manila sa nairehistro nitong average audience share na 37%, kumpara sa 34% ng GMA, at sa Metro Manila -- 41% versus 27% ng GMA. Tinutukan din ang ABSCBN sa Total Luzon sa naitalang 44%, laban sa 35% ng GMA; sa Total Visayas -- 54% versus 27% ng GMA; at sa Total Mindanao -- 49% versus 34% ng GMA.
Nananatiling numero uno top shows ang FPJ’s Ang Probinsyano (41.1%) ngayong mas tumitindi
na ang aksiyon at haharapin ni Cardo ( Coco Martin) ang samasamang pagsugod ng kanyang mga kalaban. Tinutukan din ang La Luna
Sangre (33.8%) at pinag-usapan at pinupuri pa rin sa social media ang trending na eksena nina Malia ( Kathryn Bernardo) at Jacintha ( Angel Locsin).
Patuloy din ang pamamayagpag ng TV Patrol ( 33.7%) at buong buwan na hinangaan ang kakaibang talento ng kabataan sa Little Big Shots (30.2%).
Pinagmumulan naman ng aral at inspirasyon ang pinakabagong kuwento ng Wansapanataym (29.8%) na “Jasmin’s Flower Powers” na pinagbibidahan nina Janella
Salvador at Elmo Magalona. At patuloy na naaantig ang mga manonood sa mga kwento ng
totoong buhay ng letter senders sa Maalaala Mo Kaya 25 (27.1%). Humihigpit ang pagkapit ng mga manonood sa Wildflower (25.5%) at pasok din sa listahan ang comedy shows na Home Sweetie Home ( 25.3%) at Goin’
Bulilit (23.4%). Samantala, panalo rin ang ABS-CBN sa lahat ng time blocks sa buong araw, partikular na sa primetime block na nakakuha ng average audience share na 51%, o 19 na puntos ang lamang sa 32% ng GMA.
ABS- CBN din ang nanguna sa morning block (6AM-12NN) at nagkamit ng average audience share na 41%, laban sa GMA na may 31%; sa noontime block sa pagrehistro nito ng 47%, kumpara sa GMA na may 34%; at afternoon block sa pagkuha nito ng 42% at tinalo ang GMA na may 40%.