CPP namumuhi sa bansag na ‘terorista’
Namumuhi ang Communist Party of the Philippines (CPP) sa pagbansag sa kanila, at armadong sangay nito na New People’s Army (NPA), bilang isang teroristang organisasyon.
Naglabas ng pahayag kahapon ang CPP, dalawang araw matapos nilagdaan ni Pangulong Rodrigo R. Duterte ang Proclamation No. 374, na nagdedeklara sa CPP-NPA bilang isang designated/identified terrorist organization alinsunod sa RA No. 10168, o mas kilala bilang Terrorism Financing Prevention and Suppression Act of 2002.
Binatikos ng komunistang grupo ni Duterte ang desisyon sa listahan ng US Government ng foreign terrorist organization (FTO) kung saan nakalista sila simula Agosto 9, 2002.
Banat ng grupo, dahil sa deklarasyon ay “strong contender” na ang administrasyong Duterte na makakuha ng dagdag na tulong para sa militar at armas sa ilalim ng counterterrorism budget US Government.
“By kowtowing to the US line of ‘counterterrorism,’ Duterte is opening wide the door for increased US military intervention across the country, as he did in Marawi and Mindanao when he declared the now defunct Maute group as ‘terrorists’,” ayon sa grupo.
Binatikos din ng CPP ang deklarasyon na tinatarget ang mga indibidwal o samahan na nanganganib na mabansangang terorista kapag napatunayang sila ay nagpopondo o sumusuporta sa mga komunsita.
Kaugnay nito, naglabas ang Department of Justice ng Department Order 779 na nag-aatas sa Office of the Prosecutor General na maghain ng petisyon sa kaukulang Regional Trial Court kaugnay sa deklarasyon ni Pangulong Rodigo Duterte sa CPPNPA bilang teroristang grupo. Target ng DOJ na maihain ang petisyon bago ang Disyembre 11.
Kumpiyansa si Justice Secretary Vitaliano Aguirre na papaboran ng korte ang kanilang petisyon dahil aniya sa mga ebidensiyang magpapatunay na ang mga ginagawa ng CPP-NPA ay gawain na ng isang teroristang grupo.
Samantala, hinimok ni Government peace panel (GRP) chief negotiator at Labor Secretary Silvestro Bello III kahapon ang mga komunistang lider, na pinalaya sa kondisyong makikilahok sa peace talks, na sumuko na sa mga awtoridad.
“Now that there are no more peace talks as stated by our President, those who were freed should surrender,” ani Bello sa panayam ng radyo DZRH.
Umapela siya matapos magbanta si Duterte nitong Miyerkules na ipaaresto ang 32 pinalayang lider ng National Democratic Front (NDF), kabilang ang mga lider ng NPA na sina Benito at Wilma Tiamzon.