Mosyon ni Revilla, ibinasura
Ibinasura kahapon ng Sandiganbayan ang motion for leave to file demurrer to evidence na isinampa ni dating senador Ramon “Bong” Revilla Jr. kaugnay sa pagkakadawit nito sa pork barrel fund scam.
Paliwanag nina 1st Division Associate Justices Efren dela Cruz, Geraldine Faith Econg at Reynaldo Cruz, walang sapat na merito ang nabanggit na mosyon.
“The court is of the view that there is a need for the accused to present evidence. Therefore, the motions for leave are hereby denied,” saad sa desisyon ng anti-graft court.
Tinanggihan din ng hukuman ang kahalintulad na mosyon nina Janet Lim Napoles, ang umano’y utak sa scam, at dating aide ni Revilla na si Richard Cambe.