Hinamon ng away ang mga tanod kulong

Naghihimas ngayon ng rehas ang isang 27-anyos na lalaki na inaresto ng mga nagpapatrulyang barangay tanod sa paghahamon ng away sa Sta. Mesa, Maynila, kahapon ng madaling araw.

Nakatakdang sampahan ng kasong concealing deadly weapon at Alarm and Scandal si Edward Cabanillas, ng 4544 Damka Street, sa Sta. Mesa.

Sa ulat ng Manila Police District (MPD)-Station 8, nagpapatrulya sina Barangay Tanod Pedrito Latonio at Roldan Borja, ng Barangay 598, Zone 59, District VI sa Damka St., nang mamataan ang lasing na suspek habang nakikipagtalo sa isang Christopher Diaz, dakong 12:30 ng madaling araw.

Sinubukang awatin ng mga tanod ang dalawa ngunit nagalit ang suspek at kumuha ng kutsilyo at hinamon ng away ang mga tanod.

Dahil sa komosyon, naagaw ang atensiyon ng mga nakatambay at pinagtulungang pigilan ang suspek hanggang inaresto ng mga tanod.