‘Gun runner na pusher’ huli sa entrapment
Bumagsak sa kamay ng mga tauhan ng Quezon City Police District (QCPD) at ng Philippine Drug Enforcement Agency (PDEA) ang umano’y big-time gun runner at tulak ng ilegal na droga sa entrapment operation sa Barangay Culiat, Quezon City, kahapon ng madaling araw.
Kinilala ni QCPD director Police Chief Superintendent Guillermo Lorenzo T. Eleazar ang suspek na si Derek Navado Framil, nasa hustong gulang, ng No. 12 Saint Bernadette Street, Villa Lourdes Subdivision, Bgy. Culiat.
Ayon kay Eleazar, nang matiyak na gun runner at tulak ng ilegal na droga si Framil ay agad ikinasa ang operasyon.
Armado ng search warrant, sinalakay ng mga operatiba ng QCPD PS3 Drug Enforcement Unit (DEU) at ng PDEA RO–NCR ang bahay ni Framil, dakong 12:45 ng madaling araw.
Nasamsam sa bahay ng suspek ang .45 caliber pistol; .38 caliber revolver; assembly magazine ng .45 caliber; mga bala; 30 pakete ng umano’y shabu, na nagkakahalaga ng P100,000; at mga drug paraphernalia.
Kasalukuyang nakapiit si Framil sa Camp Karingal at kinasuhan ng paglabag sa RA10591, at Sec 11 & 12 ng RA 9165.