‘The Good Son,‛ bagong craze ng televiewers

HUWAG magtaka kung bakit nagiging craze ang panonood sa The Good Son. Ang napakagandang pagkakatagni-tagni ng mga pangyayari ang nagpapasabik sa televiewers na sumusubaybay nito gabi-gabi.

Hindi makabitaw ang mga manonood sa makapigilhiningang mga rebelasyon sa istorya ng serye.

Ngayong linggo, usap-usapan at viral ang pagpatay sa imbestigador sa pagpatay sa padre de pamilya.

Inaasahan nang lalong magiging mahirap para kay Joseph ( Joshua Garcia) ang paghahanap sa katotohanan ngayong pinaslang na ng kalaguyo ni Olivia ( Eula Valdez) na si Dado ( Jeric Raval) si SPO1 Colmenares ( Michael Rivero).

Bago pa nalaman ng imbestigador ang tunay nilang ugnayan ni Olivia, siniguro ni Dado na hindi na ito makakapagsalita at agad nang pinatay gamit ang kanyang buong lakas. Sa akalang tapos na ang kanilang kalbaryo, magiging balakid naman sa kanila ang pulis ding kapatid ni SPO1 Colmenares na bagong hahawak sa kaso ng pagkamatay ni Victor ( Albert Martinez).

Samantala, kumpirmado na ni Enzo ( Jerome Ponce) ang relasyon nina Olivia at Dado na nahuli niyang naghahalikan, kaya lubos ang naging galit niya sa panlolokong ginawa ng ina.

Pero kahit masama ang loob, pinili pa rin ni Enzo na pagtakpan ang kasinungalingan ng ina at inilihim sa awtoridad ang natuklasan niya.

Sa gitna naman ng kaguluhan, kasa-kasama ni Enzo si Joseph ( Joshua Garcia) at tinanggap siya sa kanilang tirahan upang maiparamdam na mayroon itong karamay sa pinagdaraanang problema.

Ano na nga ba ang mangyayari sa imbestigasyon ngayong wala na si SPO1 Colmenares? Hanggang kailan itatatago ni Enzo ang katotohanan?

Huwag palampasin ang kakaibang kaso ng pagmamahal para sa pamilya sa The Good Son, gabi-gabi pagkatapos ng La Luna Sangre sa Primetime Bida ng ABSCBN.