Mga taong sangkot sa Dengvaxia controversy, pananagutin --Duque
TINIYAK ni Health Secretary Francisco Duque III na pananagutin ang mga responsable sa gulong dala ng dengue vaccine.
“Once it is proven that there were information that were not fully disclosed but were factors in these latest developments, someone will surely be held accountable,” ani Duque sa panayam sa radyo nitong Martes.
Tinutukoy ng health chief ang inihayag kamakailan ng Sanofi Pasteur na ang Dengvaxia vaccine, na itinurok sa mahigit 700,000 magaaral sa mga pampublikong paaralan, sa ilalim ng health department immunization program, ay magdudulot ng malubhang kaso ng sakit sa mga tumanggap ng bakuna na hindi naman nagkaroon ng dengue bago binakunahan.
Sinabi ni Duque na sasampahan ng kaso ang mga mapapatunayang nagpabaya, kapag natapos na ng departamento ang imbestigasyon.
Aniya, pinag-aaralan ng kanilang legal service department ang kontrata ng Department of Health (DoH) at ng Sanofi upang suriin ang mga legal na implikasyon sa kontrobersiya.
Isiniwalat din ni Duque na maaaring magsampa ng kaso ang mga pribadong indibidwal laban sa mga pinaniniwalaan nilang may sala.
“I heard there were already those planning to file class suits in behalf of the children who have been vaccinated and their worried parents,” aniya.
Inatasan na ang National Bureau of Investigation na imbestigahan ang kontrobersiya sa bakuna.
Inihayag din ni Duque na isinusulong nila na maibalik ang PHP3.5-billion public fund na nagastos sa pagbili ng mga nasabing bakuna sa Sanofi.
“Probably, we can ask Sanofi to refund the whole PHP3.5 billion and we will just return the remaining vaccines we still have in storage,” aniya, at sinabing na mayroon silang nakatagong bakuna sa dengue na nagkakahalaga ng aabot sa P1.4 bilyon.
Ang mga bakuna, na nakatago sa Research Institute for Tropical Medicine, ay nakatakdang mag-expire sa pagitan ng mga taong 2018 at 2019.
Sinuspinde ng Food and Drug Administration ( FDA) nitong Martes ang pagbebenta, distribusyon, at pagpapalaganap ng Dengvaxia sa bansa “in order to protect the general public”.
Sa Advisory No. 2017-318 na nilagdaan ni FDA director general, Nela Charade G. Puno, direktang ipinahayag ng ahensiya sa Sanofi na kailangan nitong magsagawa ng information campaign “through Advisories, Dear Doctor Letters, and Patient fora”.
“The FDA is closely coordinating with the Department of Health for any adverse events/ reactions that may be reported by the recipients following their immunization of Dengvaxia, and will immediately take appropriate measures to protect the public,” dagdag pa nito.
Hinimok naman ng FDA ang lahat ng mga establisimyento ng gamot, pati na rin ang consumer at non-consumer users, gaya ng health care professionals, na maging bahagi ng post-marketing surveillance ng Dengvaxia sa pamamagitan ng pag- uulat sa FDA ng anumang insidente na nagpapatunay na ang “Dengvaxia has caused or contributed to the death, serious illness, or serious injury to a consumer, a patient, or any person”.