5 pinosasan sa bisa ng warrant of arrest
Isa-isang dinakma ng mga tauhan ng Parañaque City Police ang limang katao na pawang may kinakaharap na kaso sa lungsod, nitong Huwebes ng gabi.
Sa ulat na ipinarating sa Southern Police District (SPD), nagsagawa ng Simultaneous Anti-Criminality Law Enforcement Operations ang mga tauhan ng Warrant and Subpoena Section (WSS) ng Parañaque City Police, sa pangunguna ni Senior Insp. Anthony Sardo Alising, sa iba’t ibang lugar sa lungsod, dakong 10:30 ng gabi.
Unang sinilbihan ng warrant of arrest, para sa kasong estafa, si Alfredo Briones y Torres, 33, negosyante, ng No. 50 Severina KM 18, Barangay Marcelo Green. Aabot sa P6,000 ang inirekomendang piyansa.
Sinundan ng pagdakip kay Ferdinand Montilla y Reyes, 50, ng Bgy. Tambo. Siya ay kinasuhan sa ilalim ng criminal case No. 2016-0090, sa sala ni Parañaque RTC Branch 195 Judge Aida Estrella Macapagal, at walang inirekomendang piyansa para sa pansamantala niyang paglaya.
Hinuli rin si Jhondel Apollo y Ruiz, 29, ng Phase 3 C-5 Extension, Bgy. La Huerta. Siya ay nahaharap sa kasong slight physical injuries, sa sala ni MTC Branch 90 Judge Christian Castañeda, at wala ring inirekomendang piyansa.
Sa rehas din ang bagsak ni Angelica Mojica y Miranda, 50, ng No. 102 Gardenia St., San Jose Village 2, Biñan Laguna dahil sa anim na bilang ng kasong paglabag sa BP22. Inirekomenda ng hukuman ang tigP2,000 piyansa sa bawat bilang ng kasong kinakaharap ng suspek.
Arestado rin si Jhojen Carbonell y Gonzaga, 24, ng Lot 9 Block 2, Olivarez Compound, San Dionisio, Parañaque City dahil sa tatlong bilang ng kasong paglabag sa BP22 na may tig-P20,000 piyansa.
Nakatakdang iharap sa korte ang limang suspek para sa kaukulang disposisyon.