SolGen sa kontra-ML extension: Good luck!
Kung mayroon mang mangangahas na kumuwestiyon sa Supreme Court (SC) sa isang taong extension na ibinigay sa pagpapatupad ng martial law sa Mindanao, naniniwala si Solicitor General Jose Calida na kailangan nila ng matinding suwerte.
“The extension of martial law in the whole of Mindanao, having been approved overwhelmingly by Congress, underscores the factual basis of the on-going rebellion,” paliwanag niya sa kanyang Twitter account.
“To those who intend to challenge the extension of martial law before the Supreme Court, I wish you luck. You’ll need it,” ani Calida na una nang nagpahayag ng suporta sa pagpapalawig ng batas militar sa Mindanao.
Ito ang pahayag ni Calida matapos aprubahan ng Kongreso, sa joint session nitong Miyerkules ang kahilingan ni Pangulong Rodrigo Duterte na palawigin pa ang martial law at suspensiyon ng writ of habeas corpus sa Mindanao sinula Enero 1, 2018 hanggang Disyembre 31, 2018.
May kabuuang 240 miyembro ng Kongreso ang pumabor sa pagpapalawig ng martial law laban sa 27 na kumontra rito. Bumoto ang Senado ng 14-4, habang ang House of Representatives ay bumoto ng 226-23 para aprubahan ang martial law extension.
Bago umaksiyon ang Kongreso sa kahilingan, ipinaliwanag muna ni Executive Secretary Salvador Medialdea kung bakit hinihiling ni Pangulong Duterte ang pagpapalawig ng batas militar sa Mindanao.
“Despite the liberation of Marawi City, and the eerie silence in the main battlefield, a state of actual rebellion subsists in Mindanao, perpetrated not only by remnants of the Daesh- inspired DIWM (Da’watulIslamiyah WaliyatulMasriq), but also by other local and foreign terrorist groups, including the New People’s Army, and ready to explode anew at any given time,” ani Medialdea.
Suportado ng Moro Islamic Liberation Front (MILF) at Moro National Liberation Front (MNLF) ang hakbang.
Nagpahayag ang MNLF at MILF na wala silang nakikitang problema sa pagpapalawig ng martial law dahil sa paniwala nila na ito ay magiging daan upang mas mapadali ang pagdakip sa mga kriminal at may kaugnayan sa iligal na droga.
Sinabi ni Bas Camendan, vice chairman at Human Rights Desk Officer ng Mindanao People’s Peace Movement, na dahil sa batas militar ay mahihirapang kumilos ang iba’t ibang grupo na nagnanais pabagsakin ang gobyerno.