MABUTING BALITA
Is 48:17-19 ● Slm 1 ● Mt 11:16-19
Sinabi ni Jesus sa mga tao: “Ngayon, kanino ko ikukumpara ang mga tao sa kasalukuyan? Para silang mga batang nakaupo sa mga plasa at nagkakantahan, at nagrereklamo ang ilan sa kanila: “Tinugtog namin ang plauta para sa inyo pero ayaw n’yong sumayaw, at nang umawit naman kami ng malungkot na awit, ayaw n’yo rin namang umiyak!’
“Ganito rin ang nangyari: Dumating muna si Juan na nag-aayuno, at sabi ng mga tao: ‘Inaalihan siya ng demonyo.’ At saka dumating ang Anak ng Tao na kumakain at umiinom, at ang sabi ng mga tao: ‘Lasenggo at matakaw, kaibigan ng mga publikano at mga makasalanan!’ Gayon pa man, magaling ang karunungan ng Diyos sa mga gawa nito.” PAGSASADIWA:
Para silang mga batang nakaupo sa mga plasa at nagkakantahan, at nagrereklamo ang ilan sa kanila.— Ikinumpara ni Jesus ang mga taong tumutuligsa sa kanya sa mga batang tila hindi maintindihan ang gusto sa buhay. Sabi nga nila “sala sa init, sala sa lamig.” Sila ang mga taong gumagawa o nag-iisip ng mga bagay na taliwas sa inaasahan. Sala sa init at sala din sa lamig ang tingin natin sa mga taong sa halip na gumawa ng mabuti ay masama ang ginagawa. Maaari din namang mangyari na ang itinuturing na mabuti ay siya namang masama para sa kanila at ang masama naman ay itinuturing na mabuti.
Gumawa si Jesus ng kabutihan ngunit masama pa rin ang tingin ng kanyang mga kaaway. Nakisama siya sa mga makasalanan upang akayin sila sa kabutihan ngunit napagkamalan pa siyang makasalanan. Naglaan si Juan ng panahon sa ilang upang magdasal at mag-ayuno ngunit ang tingin sa kanya’y sinasapian ng demonyo. Sa kabila ng mga pagtuligsa, nanatiling matatag si Jesus sa pagsasakatuparan ng kalooban ng Ama. Nanatili siyang mabuti sa gitna ng kasamaan.