DoH inilunsad ang Philippine National Standards for Drinking Water of 2017
IPRINISINTA ng Department of Health (DoH) nitong Martes ang Philippine National Standards for Drinking Water (PNSDW) of 2017 sa iba’t ibang stakeholders. Ang nasabing patakaran ay kumakatawan sa DoH Administrative Order No. 10 series of 2017, na nagsasaad ng standards at procedures sa kalidad ng inuming tubig, na layong protektahan ang kalusugan ng publiko at ng mga consumer.
Saklaw ng PNSDW of 2017 ang lahat ng nagbibigay ng serbisyo sa distribusyon ng inuming tubig kabilang ang gobyerno at mga pribadong developer at mga operator, mga supplier, water refilling station operators, water vending machine operators, at ice manufacturers.
Ito ay dapat ding tuparin ng lahat ng establisimiyento ng pagkain, mga tirahan, commercial, industrial at institutional na mga gusali, na gumagamit, nagsusuplay at nagbibigay ng inuming tubig; water testing laboratories; health at sanitation authorities; Ang publiko at lahat ng sangkot sa pagdedetermina ng kaligtasan ng inuming tubig ng publiko.
Ang mga pangkalahatang alituntunin ay sumusunod sa mga pamantayan para sa kalidad ng inuming tubig, sampling ng tubig at ebalwasyon ng mga resulta sa eksaminasyon.
Bukod pa rito, ang mga pamantayang ito ay parepareho, sa pinahusay na balangkas para sa kaligtasan ng pag-inom ng tubig na ini-promote ng WHO, na binubuo ng tatlong pangunahing bahagi: mga target na nakabatay sa kalusugan na itinatag ng awtoridad; ligtas na pinamamahalaang mga sistema ng tubig (aplikasyon ng planong kaligtasan ng tubig); at, isang sistema ng independiyenteng pagsubaybay.
Upang matiyak ang kaligtasan ng inuming tubig, mayroong pitong gabay na dapat sundin. Kabilang dito ang: pagsukat ng kalidad; water sampling at pagsusuri dito; iba pang mga paraan ng pamamahagi ng inuming tubig; pagsusuri ng mga resulta; pag-uuri ng mga parameter ng kalidad ng tubig; katiyakan sa kalidad o pagkontrol sa kalidad para sa mga laboratoryo ng tubig; at plano sa kaligtasan ng tubig (WSP) at kalidad ng pagsubaybay.
Nagtulungan ang iba’t ibang mga ahensiya ng gobyerno at nongovernment agencies upang ipatupad ang patakarang ito, na ang bawat isa ay may isang tinukoy na papel na gagampanan sa paglilingkod na ito, na binubuo ng DoH, mga lokal na pamahalaan, mga laboratoryo ng tubig, at tagapagkaloob ng serbisyo ng inuming tubig at operator ng establisimiyento o gusali.
“Defining the standards and procedures to determine the safety of drinking water, a basic necessity in life, is certainly crucial. Thus, the DOH is proud to present this document which outlines the National Standards for Drinking Water of 2017. Truly, I must say that water is life so we have to protect, conserve and put so much importance in it in the course of our everyday living,” idineklara ni Health Secretary Francisco T. Duque III.
Idinagdag pa ng Secretary na makaraan ang sampung taon, at para sa ikalawang pagkakataon, siya ay lubos na nalulugod na naging bahagi ng opisyal na paglulunsad ng parehong PNSDW ng 2007 at 2017. Pinangunahan ng DoH, sa tulong teknikal at pinansyal ng WHO, ang updating ng PNSDW.