‘URDUJA’ NANALASA

Tumama sa Samar; 31 lugar inalerto sa baha, landslide

Aabot sa 14 na lalawigan ang nasa Signal No. 2, habang 17 pang probinsiya ang apektado sa pananalasa ng bagyong ‘ Urduja’, na naglandfall kahapon sa Eastern Samar.

Batay sa weather bulletin ng PAGASA kahapon, isinailalim sa Signal No. 2 ang: Albay, Sorsogon, Masbate, kasama na ang Burias at Ticao Islands, Romblon, Northern Samar, Eastern Samar, Samar, Biliran, Leyte, Aklan, Capiz, at Northen Iloilo.

Nasa Signal No. 1 naman kahapon ang Southern Quezon,a Mindoro, Marinduque, Catanduanes, Camarines Norte, Camarines Sur, Cuyo Islands, Calamian Group of Islands, Antique, iba pang bahagi ng Iloilo, Guimaras, Negros Occidental, Northern Negros Oriental, Cebu, Northern Bohol, Southern Leyte, at Dinagat Islands.

Napaulat na isinailalim na kahapon sa state of calamity ang Tacloban City sa Leyte dahil sa matinding baha na dulot ng Urduja.

MAHIGIT 160,000 APEKTADO

Iniulat din ng National Disaster Risk Reduction and Management Council (NDRRMC) na tatlong katao, kabilang ang isang dalawang taong gulang na bata, ang umano’y nasawi sa bagyo.

Inihayag din ng NDRRMC na aabot sa mahigit 35,000 pamilya, o halos 160,000 katao, sa Eastern Visayas at Caraga region ang apektado ng Urduja.

Nasa 111 pamilya, o 363 katao, na rin ang inilikas sa Bicol, habang mahigit 1,000 naman sa Cebu.

STRANDED Mahigit 11,000 pasahero naman ang stranded sa iba’t ibang pantalan sa bansa, partikular sa Eastern at Western Visayas, Bicol, at Southern Tagalog.

Bigo ring makapaglayag ang 1,322 vessels, 52 cargo at 33 motorbanca dahil na rin sa laki ng mga alon. AYUDA PINONDOHAN

Samantala, naglaan ang Department of Social Welfare and Development (DSWD) ng P245 milyon pondo at mahigit P600 milyon halaga ng relief goods sa mga maaapektuhan ng Urduja.

Binanggit ni Aldczar Aurelio, weather specialist ng PAGASA, na bahagyang lumakas ang bagyo na huling namataan sa layong 75 kilometro sa hilaga, hilaga-silangan ng Borongan City, Eastern Samar, o nasa 120 kilometro sa silangantimog-silangan ng Catarman, Northern Samar.

“It is packing maximum sustained winds of 80 kms per hour near the center and gustiness of up to 95 kph. Urduja is moving west at 15 kph,” ayon sa advisory ng PAGASA.

Inaasahang lalabas ang Urduja ng Philippine area of responsibility ( PAR) sa Miyerkules.

ISA PANG BAGYO Gayunman, sinabi ni Aurelio na isang low pressure area (LPA) ang namataan sa labas ng PAR at ito ay nasa layong 2,180 kilometro sa silangan ng General Santos City.

Aniya, kapag naging bagyo ay tatawagin itong ‘Vinta’, at inaasahang papasok sa PAR sa Martes, Disyembre 19.

JUAN CARLO DE VELA ‘SAAN NA’NG BAKA KO?! Hinahanap ng lalaki ang kanyang alagang baka sa malawak na bukirin habang hinahagupit ng malakas na hangin at ulan ang Bogo City, Cebu dahil sa bagyong ‘Urduja’, na nag-landfall sa Eastern Samar kahapon.

BANGIS NG BAGYO Sinusubukan ng mga residente na alisin sa kalsada ang nabuwal na puno ng niyog sa Bgy. Poblacion, Sogod, sa kasagsagan ng pananalasa ng bagyong ‘Urduja’ kahapon. Aabot naman sa 40 pamilyang malapit sa ilog ang lumikas mula sa barangay sa posibilidad na tumaas ng tubig sa ilog.