R4- M pabuya sa drug informants
Mainit-init na P4.8 milyon ang tinanggap ng apat na impormante mula sa Operation Private Eye (OPE) ng Philippine Drug Enforcement Agency (PDEA), bilang gantimpala at paghimok sa mga pribadong mamamayan na isuplong ang mga hinihinalang sangkot sa ilegal na droga sa kanikanilang barangay.
Kinilala ni PDEA Director General Aaron Aquino ang mga impormante sa mga code name na Toffee, James, Cold Ice at Bash, na pawang nagbigay ng impormasyon na ikinaaresto ng drug personalities, pagkakasamsam ng kilo-kilong shabu, at pagbuwag sa malaking shabu laboratory.
Ayon kay Aquino, ang mga impormante, na tumanggap ng gantimpala sa isang simpleng seremonya sa tanggapan ng PDEA kahapon, ay pawang hindi kinilala para sa kanilang proteksiyon.
Kasabay ntio, nag-alok naman si Pangulong Duterte ng P500,000 para sa sinumang makapagbibigay ng pangalan ng sangkot sa ilegal na droga.
Sa pagdalaw ng Pangulo sa labi ni PO3 Wilfredo Gueta, sa Maybunga, Pasig City nitong Martes, sinabi niyang babayaran niya ang impormasyong makatutulong para sugpuin ang ilegal na droga sa bansa.
Aniya, hindi naman kinakailangang direktang ibigay sa kanya ang pangalan ng sangkot sa droga kundi maaari na lamang itong ibulong sa kanilang barangay chairman, na magsusumite naman ng pangalan sa pulisya.
“Magsabi lang ako ngayon, o, sige bigyan n’yo ako impormasyon. Babayad ako ng P500,000. Ibigay ko roon sinong gusto ninyo, sa barangay captain ninyo. Bigyan mo ako ng pangalan. Bayad ako bukas 500,000. Walang lokohan,” ani Duterte.