R75k droga nasamsam sa 3 drug suspects
Tinatayang aabot sa P75,000 halaga ng ilegal na droga ang nasamsam mula sa tatlong lalaki, kabilang ang magkapatid, sa pinagsanib na operasyon sa Barangay Payatas B, Quezon City nitong Huwebes.
Kinilala ni Quezon City Police District director Chief Superintendent Guillermo Eleazar ang tatlo umanong drug personalities na sina brothers Mark Anthony Zafra, 30, at Mark John Zafra, at Ariel Agustin, 35, pawang ng Bgy. Payatas B.
Sumalakay ang mga miyembro ng QCPD Drug Enforcement Unit, sa pangunguna ni Chief Inspector Ferdinand Mendoza, katuwang ang mga operatiba ng Special Reaction Unit, Batasan Police Station (PS-6), at ng Philippine Drug Enforcement Agency matapos mag-isyu ang QC court ng search warrant laban sa tatlo dahil sa ilegal na aktibidad.
Sinabi ng pulis na isang concerned citizen ang nag-tip sa kanila hinggil sa ilegal na aktibidad ng tatlo na nagresulta sa pagbuo ng warrant of arrest.
Isinagawa ang operasyon sa bahay ng mga suspek sa kahabaan ng Ipil-ipil Street sa Bgy. Payatas B, bandang 4:45 ng hapon.
Nang marating ang nasabing lugar, sinabi ni Mendoza na iba’t ibang drug paraphernalia ang natagpuan sa bahay.
Nakuha mula sa mga suspek ang 35 pakete ng umano’y shabu, na may bigat na 15 gramo, na tinatayang nagkakahalaga ng P75,000, iba’t ibang drug paraphernalia, isang pistol barrel at mga bala, na naging sanhi ng kanilang pag-aresto.
Ikinulong ang mga inaresto sa QCPD Headquarters at mahaharap sa drug-related charges at illegal posession of firearms.