Rating ni Digong ‘very good’ uli
Siniguro ng Malacañang sa publiko na pagsusumikapan ng administrasyong Duterte na matupad ang pangako nito na maghatid ng komportableng buhay sa bawat mamamayang Pilipino.
Ito ay matapos tumaas ng 10 puntos ang net satisfaction rating ni Pangulong Duterte para sa huling bahagi ng 2017, base sa Social Weather Stations (SWS).
Sa isang pahayag, pinasalamatan ni Presidential Spokesperson Harry Roque ang publiko para sa “very good” rating ng Pangulo.
“We thank the Filipino people for the 10point rise in the net satisfaction of President Rodrigo Roa Duterte’s performance which stands at +58 in December from the previous +48 in September,” sabi ni Roque.
Ayon sa Palace official, sasalubungin ng administrasyon ang bagong taon na may mataas na public confidence mula sa geographical areas, sa urban at rural areas, sa lahat ng socioeconomic classes, sa kalalakihan at kababaihan, at lahat ng educational levels.
“We therefore assure everyone that that this public sentiment, classified by Social Weather Stations (SWS) as very good, would be a source of inspiration for the President and his team to continuously work hard to bring a comfortable life for all Filipinos under a trustworthy government,” ani Roque.
Samantala, pinasalamatan ni Presidential Communications Operations Office (PCOO) Secretary Martin Andanar ang economic managers ng Pangulo at sa Kongreso sa pagpasa ng Tax Reform for Acceleration and Inclusion (TRAIN) Act, kaya tumaas ang ratings ni Duterte.
“We must also give it to the economic cluster of the President’s Cabinet at sa ating mga congressmen, mga senador na nagtrabaho upang maisabatas itong tax reform [act],” sabi ni Andanar sa panayam sa Radyo Pilipinas nitong Sabado.
Sa nasabing SWS survey, 71 porsiyento ng mga Pilipino ay kuntento sa trabaho ni Duterte, tumaas ng apat na puntos mula sa 67 porsiyento na kanyang nakuha nitong Setyembre.
Ini-report din ng SWS na 13% ang nagsabing sila ay hindi kuntento, mas mababa ng anim na puntos sa survey nitong last quarter. Nasa 15% naman ang undecided.
Napanatili ng Pangulo ang kanyang “very good” rating sa Mindanao (+80). Nakakuha siya ng “good” mula “very good” rating sa Metro Manila (+55), Balance Luzon (+50), at Visayas (+53).
Napanatili rin ni Duterte ang kanyang “very good” net satisfaction rating sa Classes A, B, at C, itinala ang nine-point increase mula sa +59 nitong Setyembre, naging +66 ngayong quarter. Umangat din siya mula sa “good” ay naging “very good” sa classes D (+57), at E (+65).
Nitong nakaraang buwan, malugod na tinanggap ng Malacañang ang resulta ng isang Pulse Asia survey na nagsasabing si Pangulong Duterte ang pinakapinagkakatiwalaang chief executive simula noong panahon ni dating pangulo at ngayo’y Manila Mayor Joseph Estrada.
Base sa “Comparative Performance and Trust Ratings of Presidents (May 1999 to September 2017)” ng Pulse Asia, umani si Duterte ng 80-percent trust rating nitong Setyembre.
Sa third quarter survey ng Pulse Asia, mula Setyembre 24-30, walo sa 10 Pinoy ang nagsabing patuloy nilang pinagkakatiwalaan ang Pangulo at sang-ayon sila sa ginagawa nito.
“We are pleased with the people’s verdict giving President Rodrigo Roa Duterte 80% approval rating and 80% trust rating – the highest since the time of former President Joseph Ejercito Estrada,” pahayag ni Roque.
“The President accepts this public appreciation with all humility, but regardless of survey results, PRRD and the members of his Cabinet would continue to work and advance public interests and build, as he said in numerous occasions, a nation worthy of the Filipinos,” dagdag niya.