Nangikil ng R20k bago magpakasal, tiklo

Inaresto sa Quezon City ang isang lalaki na umano’y nangikil sa kanyang fiance na isang overseas Filipino worker (OFW), iniulat ng GMA News Online.

Base sa ulat, nagbanta umano si Raul Domingo, 39, na hindi siya sisipot sa kasal nila ni Paula, 40, kung hindi siya nito babayaran.

Dahil dito, ikinasa ng CIDG-Quezon City ang entrapment operation laban kay Domingo sa isang restaurant sa Katipunan Avenue.

“Nitong huling usapan namin, noon lang po siya naging talagang aggressive, talagang directly asking money from me. Before po talaga, ‘yung mga gastusin ako naglalabas,” reklamo ng biktima.

Si Paula ay music teacher sa Singapore at gusto na umano niyang lumagay sa tahimik at akala niya ay si Domingo ang kanyang makakatuluyan.

“Siyempre po nanghihinayang, kasi pinagkatiwalaan ko siya, minahal ko naman po talaga kasi nga po mabuting tao siya, mabait siya. Tapos po ‘yung pag-uusap namin wala ka pong mararamdaman na may tinatago siya kasi napakakalmado niya,” ayon sa biktima.

Samantala, iniimbestigahan na ng CIDG kung may iba pang nabiktima si Domingo dahil posible umanong “modus” ito ng suspek.

“Baka meron pang nakakakilala sa tao na naloko rin, especially ‘yung mga kababayan natin na OFW, kasi ‘yun po ‘yung mga prone sa ganito, nabibiktima ng mga ganitong tao,” sabi ni Police Senior Inspector Paolo Benito, Deputy Chief, CIDG, Quezon City.