Trabaho sa empleyado ng NCCC Mall at SSI tiniyak

Sunod-sunod ang isinagawang pagkikipagpulong ng Department of Labor and Employment (DOLE) sa management ng NCCC Mall at SSI upang matiyak na walang manggagawa na apektado ng sunog ang mawawalan ng trabaho.

Kasabay nito, iniutos ni Labor Secretary Silvestre Bello III na maglabas ng P30 milyon sa mga ahensiya upang mabigyan ng tulong ang lahat ng nawalan ng tirahan, na nasa mahigit 2,000 apektadong manggagawa.

Inatasan din na magbigay ng tulong ang Bureau of Working Conditions (BWC), Occupational Safety and Health Center (OSHC) at ang Employees’ Compensation Commission (ECC).

Nangako ang NCCC sa DOLE na hindi mawawalan ng trabaho ang 616 na regular na manggagawa at patuloy na makatatanggap ng kanilang sahod dahil itatalaga ang mga ito sa iba nilang negosyo.

Para sa 192 manggagawa na galing agency sa ilalim ng Bmirck Cooperative, sinabi ng NCCC na patuloy ang pag-uusap para mailipat ang mga ito sa ibang establisimyento /malls sa lungsod.

Nangako naman ang SSI na babayaran ang suweldo ng lahat ng kanilang mga empleyado hanggang Disyembre 31, 2017. Idinagdag ng SSI na muli silang magtatayo sa loob ng 60 araw dahil nakakita na sila ng isa pang gusali para sa kanilang mga operasyon at tiniyak ang trabaho ng kanilang mga manggagawa sa pagpapatuloy ng kanilang operasyon.