9 nasagip sa Chinese vessel, suspek sa drug trafficking

PALO, Leyte- Itinuturing ng pulisya na mga suspek sa drug trafficking ang siyam na tripulante ng Chinese cargo ship na lumubog sa baybayin ng Pambujan, Northern Samar.

Sinabi ng Police Regional Director ng Eastern Visayas na si Chief Supt. Gilbert DC Cruz na galing sa cargo ship na Jin Ming 6 nanggaling ang P125 milyong halaga ng cocaine na natagpuan sa dalampasigan ng Luag Lagoon, Matnog, Sorsogon.

"Yes, they are suspects," ani Cruz patukoy sa siyam na tripulante ng Jin Ming 6 na nasagip ng mga lokal na awtoridad ng Pambujan noong Enero 2.

Sinabi ni Cruz na nagpadala na siya ng isang mga imbestigador mula sa Regional Investigation Division (RID) ng Philippine National Police (PNP)Regional Office sa Pambujan.

Nasa kustodiya ng Bureau of Immigration (BI) at Pambujan police ang mga tripulante.

Ang barko ay binabantayan ng Philippine Coast Guard at iinspeksiyunin ng mga operatiba ng Philippine Drug Enforcement Agency (PDEA) at Bureau of Customs na maghahanap ng mga karagdagang ebidensiya.

Sinabi ng Cruz na nahihirapan ang mga awtoridad na pasukin ang lumubog na barko at kailangan pa itong hilahin patungo sa pampang.

Anim sa mga tripulante ay mula sa China, dalawa ang taga-Hong Kong, at isa mula sa Taiwan.

Sinasabing galing sa China ang Jin Ming 6 nang hampasin ng malalakas na alon sa kasagsagan ng Bagyong Agaton.