232 dayuhang pugante nadampot, naipa-deport

May kabuuang 232 dayuhang pugante ang naaresto ng Bureau of Immigration (BI) noong 2017, makaraang magtago sa bansa upang maiwasan ang pag-uusig at sentensiya sa kani- kanilang bansa.

Ayon kay BI Commissioner Jaime Morente, nadagdagan ng 97 kaso ang bilang ng mga naarestong dayuhan noong nakaraang taon kaysa noong 2016, na nakapagtala naman ng 135 kaso.

Sinabi ni Morente na naaresto ang mga dayuhan sa iba’t ibang operasyon na ikinasa ng mga operatiba ng BI Fugitive Search Unit (FSU) sa iba’t ibang lugar sa bansa.

Aniya, lahat ng nahuling pugante ay ipina- deport na at doon na nakabilanggo.

“They were also placed in our blacklist of undesirable aliens to make sure that they do not return to the Philippines and pose a risk to our public safety and security,” anang BI chief.

Nabatid na ilan sa mga nahuling pugante ay nabibilang sa “high-value targets” dahil sa bigat ng kinahaharap nilang krimen.

Kabilang sa kanila si Hussein Aldhafiri, bomb maker sa Kuwait at hinihinalang miyembro ng ISIS, na naaresto sa Taguig City noong Marso.

Kasabay niyang naaresto si Rahaf Zina, Syrian na umano’y biyuda ng namatay na si Abu Jandal, dating ISIS leader sa Iraq.

Napag- alaman na sa 232 dayuhan, 178 ang naaresto sa bisa ng mission order na inilabas ni Morente, habang ang 41 ay sa bisa ng subject of deportation warrant, na inilabas alinsunod sa kautusan ng BI board of commissioners. Ang iba naman ay nakabalik, sumuko o naharang sa mga paliparan.