Grupong susupil sa kurapsiyon sa BoC binuo
Isang grupo na mag-iimbestiga sa mga sumbong na katiwalian ng customs employees ang nilikha ng Bureau of Customs (BoC).
Kinumpirma ni Customs Commissioner Isidro Lapeña nitong Lunes na ipinag-utos niya ang paglikha ng Interim Internal Affairs and Integrity Unit (IIAIU) para matugunan ang matagal nang isyu ng kurapsiyon sa kagawaran.
Ayon sa commissioner, pangunahing mandato ng unit na supilin ang mga ilegal na gawain ng ilang opisyal at empleyado ng BoC para magkamal ng ill-gotten wealth.
Sa regular flag raising ceremony nitong Lunes, kinumpirma ni Lapeña na isang “major reshuffle” ang magaganap.
“As I’ve said, if you cannot follow, step aside. If you cannot step aside, I will take you out,” babala ni Lapeña.
Batay sa memorandum na inilabas noong Disyembre 29, 2017, iimbestigahan ng unit ang mga reklamo laban sa BOC personnel, tatanggap at mangangalap ng mga ebidensiya para suportahan ang open investigation.
Sisilipin din ng bagong tatag na unit ang lifestyle ng customs personnel at magrerekomenda ng paghahain ng kaukulang kasong kriminal sa korte laban sa mga tauhan batay sa mga ebidensiya at aayudahan ang prosekusyon sa kaso.
Ang IIAIU ay pinamumunuan ng Commissioner at binubuo ng isang abogado, dalawang special investigators, at tatlong administrative staff. Lahat ng mga ulat ay isusumite buwan-buwan sa commissioner.