Duterte tuloy ang pagpapalakas sa China

Isinusulong ng Pilipinas ang mas matatag na relasyon sa China sa kabila ng patuloy na agawan sa teritoryo sa South China Sea.

Nagpahayag si Pangulong Duterte ng pagnanais na palakasin pa ang relasyon sa China sa pakikipagpulong sa delegasyon ng Communist Party of China (CPC) sa pamumuno ni Meng Xiangfeng sa Malacañang nitong Martes.

“During the meet and greet at Malacañang Palace, the President reiterated ‘our desire and wish of the Filipino people that we make our bond stronger,’” saad sa pahayag ng Malacañang.

“He further noted that the bond is ‘improving every day,’” dagdag ng Palasyo.

Naganap ang pakikipagpulong ng Pangulo sa mga miyembro ng Chinese party sa gitna ng mga ulat ng patuloy na construction activities ng China sa Kagitingan Reef na nasa bahagi ng pinagtatalunang South China Sea.

Nauna nang inirekomenda ni Defense Secretary Delfin Lorenzana ang paghahain ng diplomatic protest kapag napatunayan ang military buildup ng China sa reef.

Sumang-ayon ang Palasyo na ang ganitong protesta ang “proper remedy” sa pagtutol ng gobyerno sa anumang militarisasyon sa teritoryo dahil magiging banta ito sa kapayapaan at seguridad sa lugar.

Ngunit pinanindigan ng Palasyo hindi pa rin sumira sa good faith ang China na huwag nang isulong ang panibagong reclamation sa lugar.

Kasama rin sa pagpupulong ng Pangulo ang mga miyembro ng CPC na sina Yuan Zhibing, Director General ng Bureau One International Department ng CPC; Lin Zhi, Division Chief, Personnel Bureau, CPC; at Du Dingding, Division Chief, Bureau One International Department ng CPC. Dumalo rin sa pagpupulong sa Palasyo sina Chinese Ambassador to the Philippines Zhao Jianhua, at Embassy of China Counsellor Sun Yi.

Nasa Manila ang mga miyembro ng CPC party sa imbitasyon ng namumunong Partido Demokratiko Pilipino-Lakas ng Bayan (PDP-Laban).

Kasama rin sa pagpupulong sina Senate President Aquilino Pimentel III at Energy Secretary Alfonso Cusi.