BJMP vs riding-in-tandems, 4 patay

Apat ang kumpirmadong patay matapos magkaroon ng engkuwentro sa pagitan ng mga tauhan ng Bureau of Jail Management and Penology (BJMP), ng Muntinlupa City Jail, at dalawa hanggang tatlong riding-intandem suspects sa Muntinlupa City kahapon.

Binawian ng buhay sa Muntinlupa Medical Center ang mga biktimang sina Jail Officer (JO) 2 Elmer Malibdao at JO1 Felino Salazar, kapwa nasa hustong gulang, at nakatalaga sa Muntinlupa Jail, bandang 8:59 ng umaga.

Dead on the spot ang isang hindi pa nakikilalang suspek habang namatay naman sa Ospital ng Muntinlupa ang isa pa.

Samantala, isang Prison Guard 1 TJ Tanael, nakatalaga sa Bureau of Corrections (BuCor), ang inaresto sa pinangyarihan ng insidente at ikinokonsiderang “person of interest”.

Sa ulat ni Chief Supt. Tomas Apolinario, Southern Police District (SPD) director, naganap ang pananambang sa tapat ng isang mall sa kahabaan ng National Road, Barangay Tunasan, Muntinlupa City, ilang metro ang layo mula sa tanggapan ng BJMP na katabi ng Police Community Precinct (PCP) 1 ng Muntinlupa City Police, bandang 8:30 ng umaga.

Sa inisyal na imbestigasyon, kalalabas lang nina JO2 Malibdao at JO1 Salazar sa kanilang tanggapan nang abangan at pagbabarilin ng apat hanggang anim na armado na sakay sa tatlong motorsiklo.

Hindi pa malinaw kung nakapagpaputok ng baril ang dalawang BJMP personnel sa kasagsagan ng engkuwentro, at dahil malapit lang sa pinangyarihan ay nagkasa ng drag net operation ang mga pulis at kanilang mga kabaro na naging sanhi ng pagkamatay ng mga suspek.

Patuloy na nangangalap ng ebidensiya ang awtoridad, gaya ng closed-circuit television (CCTV) footage, upang matukoy ang pagkakakilanlan ng mga armado.

Sinasabing kalilipat lang nina JO2 Malibdao at JO1 Salazar sa Muntinlupa Jail mula sa Metro Manila District Jail sa Camp Bagong Diwa, Bicutan sa Taguig City.