Taxi driver inatado, hinoldap
Nasa malubhang kalagayan ang isang taxi driver nang pagsasaksakin at holdapin ng dalawang hindi pa nakikilalang suspek sa Caloocan City, kahapon ng madaling araw.
Kinilala ang biktima na si Nelson Bernardino, 56, residente ng No. 720 Jereimas Street, Barangay Karuhatan, Valenzuela City.
Siya ay nagtamo ng mga saksak sa iba't ibang bahagi ng katawan at kasalukuyang ginagamot sa Manila Central University (MCU) Hospital.
Base sa report, isang saksi ang nagsabing naka-hazard ang ilaw ng taxi (WYI-541) na minamaneho ng biktima at nakahinto sa 5th Avenue, South Bound sa harap ng isang funeral homes, dakong 2:45 ng madaling araw.
Sumilip sa salamin ang saksi nakitang sinasaksak ng mga suspek si Bernardino.
Bumaba mula sa taxi ang mga suspek at tangay ang isang bag na pinaniniwalaang pagmamay-ari ng biktima na naglalaman ng hindi pa batid na halaga.