58 bata patay sa measles outbreak

JAYAPURA (AP) – Nahihirapan ang mga awtoridad ng Indonesia na masugpo ang isang buwan nang outbreak ng measles sa silangan ng Papua province na ikinamatay na ng dose-dosenang bata.

Sinabi ni Stefanus Lange, doktor sa ospital ng gobyerno sa Asmat district ng Papua, nitong Martes na unang na-detect ang kaso noong Setyembre ngunit naging hadlang sa paggamot at pagbabakuna ang liblib na mga lugar na mahirap marating at madalas na paglalakbay ng mga residente.

Ayon kay Lange, 36 na biktima ang namatay sa Pulau Tiga sub-district at 22 sa Agats, ang pangunahing bayan at kabisera ng Asmat district.

Isang grupo ng mahigit 50 doktor at paramedics mula sa Indonesian military ang dumating sa probinsiya nitong Martes para tumulong sa paglaban sa sakit.