Maagang regla, menopause may kaugnayan sa sakit sa puso

PARIS ( AFP) – Ang mga babaeng maagang nagsimulang magkaroon ng regla sa edad na 11 o mas bata pa, o nagmenopause bago tumuntong sa edad na 47, ay mas nanganganib na magkaroon ng sakit sa puso at stroke, ayon sa pag-aaral na inilathala nitong Martes.

Iniuugnay din ang miscarriage, stillbirth, pagsailalim sa hysterectomy, pagkakaroon ng anak sa mas batang edad sa pagtaas ng posibilidad ng problema sa puso sa pagtanda, ayon sa natuklasan ng mga mananaliksik.

Nag- iiba lamang ang karagdagang panganib ng ilang percentage points sa mahigit 40 porsiyento, ulat ng researchers sa Heart journal.

Hindi ito ang unang pagkakadiskubre sa kaugnayan ng reproductive factors sa cardiovascular diseases, at ang data ay hindi nagpapakita ng causal relationship, babala ng mga may-akda.

Ngunit pinalalakas ng kanilang findings ang koneksiyon at nagsuhestiyon na ang mga babaeng may premature reproductive cycles o kasaysayan ng adverse events ay kinakailangang palagiang magpasuri sa sakit sa puso at mga kondisyon na nagdudulot ng blood clots.

Kumuha ang scientists ng data sa long- term health survey sa Britain na sumusubaybay at sumusuri sa mahigit sangkapat ng isang milyong babae mula 2006 hanggang 2016. Ang average age ng mga babae ay 56 nang simulan ang monitoring.

Nalaman sa pag- aaral na ang mga babae na nagsimulang magkaroon ng regla o menstruation bago tumuntong sa edad 12 ay mas mataas ng 10% ang panganib sa cardiovascular disease kumpara sa mas matatanda na nang magsimulang abutan ng regla.

Sa mga nag- menopause bago tumuntong sa edad 47, ang panganib ng sakit sa puso ay tumaas ng 33%, at 42% naman sa sa stroke.

Iniuugnay din ang miscarriages sa mas mataas na panganib ng sakit sa puso, na ang bawat stillbirth ay nagtataas ng panganib ng 6%.

Ang hysterectomy ay iniugnay sa 20% mas mataas na posibilidad ng pagkakaroon ng sakit sa puso, natuklasan ng grupo.