Ph fighter, wagi sa WBC Asian title

THAILAND (PNA) – Dalawang beses na pinatumba ni Filipino journeyman Edison “Kamatis” Berwela ang karibal na si Thiranan Matsali ng Thailand tungo sa 6th round knockout win at angkinin ang bakanteng WBC Asian Boxing Council bantamweight title nitong Biyernes sa Pathum Thani.

Unang pinaluhod ng 34-anyos na si Berwela ang karibal sa ikatlong round, bago inulit sa kaagahan ng ikaanim na round tungo sa impresibong panalo at ipalasap kay Matsali, dating IBF Pan Pacific at WBC Asian Boxing Council Silver bantamweight champion, ang unang kabiguan sa pro career.

Kilala bilang Saenganan Sithsaithong, bagsak ang Thai star sa 19- 1 marka, habang nahila ni Berwela ang marka sa 16 panalo sa 37 laban.

Galing si Berwela sa unanimous decision na kabiguan kay PABA super bantamweight champion Anurak Thisa noong Agosto 31 sa Bangkok University, Thonburi Campus sa Bangkok.

“Masayang masaya po ako at nag-champion ulit ako,” pahayag ni Berwela.