Mangingisdang Pinoy prioridad ng PH sa Panatag Shoal

Pinanindigan ng Malacañang ang pagmamay-ari ng Pilipinas sa Panatag Shoal (Scarborough Shoal) sa pinagtatalunang bahagi ng South China Sea at sa Philippine Rise (Benham Rise) sa Silangan ng Luzon sa kabila ng mga aktibidad ng mga Chinese roon kamakailan.

Ito ang ipinahayag ni Presidential Spokesperson Harry Roque kasunod ng mga ulat na nagprotesta ang China sa presensiya ng United States sa Panatag Shoal, at mga ulat ng scientific research ng China sa Philippine Rise.

Sa regular Palace press briefing, sinabi ni Roque na hindi maikialam ang Pilipinas sa isyu ng US at China dahil nakatuon ang interes ng bansa sa kapakanan ng mga mangingisda sa lugar.

“Ang nagpapalitan po ng maaanghang na salita ay sa panig ng Estados Unidos at ng China. Hindi na po tayo manghihimasok diyan,” sinabi ni Roque kahapon.

“Ang interes po ng Pilipino, ngayon ng Pilipinas, ay iyong karapatan ng ating mga mangingisda na magpatuloy sa kanilang hanapbuhay na pangingisda diyan sa Borough at iyan naman po ang nangyayari ngayon,” dadag niya.

Gayunman, tiniyak ni Roque, na hindi isusuko ng Pilipinas ang karapatan nito sa Panatag Shoal sa kabila ng alitan ng dalawang superpowers.

“Tayo po ay patuloy na naninindigan na ang Scarborough ay teritoryo ng Pilipinas pero isinantabi na po muna natin ang usaping titulo diyan sa Borough para magkaroon ng hanapbuhay ang ating mga mamamayan,” ani Roque.

Ibinasura rin ng opisyal ng Palasyo ang mga pang-aangkin ng China sa karagatang malapit sa Zambales.

“Eh, ‘di mag-claim sila nang magclaim. Tayo po, malinaw na malinaw ang lahat ng ebidensiya na nagpapatunay sa ating soberanya,” ani Roque.

Binanggit ni Roque ang desisyon ng Permanent Court of Arbitration na nagpapawalang-bisa sa pang-aangkin ng China sa pinagtatalunang karagatan batay sa kanilang nine-dash line.

Samantala, muling idiniin ni Roque na maaaring pahintulutan ng Pilipinas ang alinmang bansa na magsagawa ng pananaliksik sa Philippine Rise basta’t mayroong kasamang Filipino scientists at ang resulta ng pananaliksik ay ibabahagi sa gobyerno ng Pilipinas.