Malacañang sa frigate deal: Imbestigahan ‘yan!
Iniutos na ng Malacañang na maimbestigahan ang P15.5-bilyon frigate deal project sa pagitan ng Department of National Defense (DND) at ng isang Korean firm, dahil sa bribery controversy.
Depensa ni Presidential Spokesperson Harry Roque, ang naturang hakbang ay bilang tugon sa alegasyon ni Magdalo Party-list Rep. Gary Alejano na sangkot sa panunuhol ang contractor na Hyundai Heavy Industries sa Navy frigate deal.
Sa isang press conference sa Laoag, Ilocos Norte, pinasalamatan din ni Roque si Alejano sa pagsisiwalat sa naturang usapin.
Tiniyak ni Roque na pananagutin nila sa kontrobersiya ang mga dating opisyal ng pamahalaan sa nakaraang administrasyon kapag napatunayang sangkot ang mga ito sa anomalya.
“Salamat po kay Congressman Alejano. Alam ninyo po, napapagod na ang Presidente na depensahan ang mga kontrata na ipinasok ng nakalipas na administrasyon. Dahil po dito na naman sa sinasabi ni Alejano, ay siguro po dapat napapanahon na, na imbestigahan iyong mga kakampi niya kung ano talaga ginawa nila dito sa frigate deal na ito,” sabi ni Roque.
Nakiusap din si Roque kay Alejano na huwag umatras sa imbestigasyon dahil mga kaalyado umano nito ang isasalang sa imbestigasyon.
“Baka naman dahil mga kakampi niya ang iimbestigahan dahil diyan sa frigate deal ay biglang manahimik siya. Dapat kasing-maingay siya at persistent kapag inimbestigahan na natin iyong kanyang mga kakampi,” ani Roque.
Isinisi rin ni Roque sa nakalipas na administrasyon ang pagpili ng winning bidder sa proyekto at kasalanan, aniya, ng mga ito kung nagpabaya sila sa katotohanan na nai-ban sa South Korea ang nasabing kumpanya.
“Kung totoo na blacklisted iyong binigyan nila ng kontrata, dapat managot iyong mga opisyales ng nakalipas na administrasyon at sabihin sa atin bakit naging ganoon ang kanilang desisyon.
Uulitin ko po, done deal na ‘yan nang pumasok ang gobyerno. Ang inissue lang po ng gobyerno ni Presidente Duterte, iyong Notice of Award,” depensa ng tagapagsalita ng pangulo.
Sumingaw ang kontrobersya sa frigate contract nang akusahan ng isang online media outfit si Special Assistant to the President Christopher “Bong” Go na nakikialam umano sa pagpili ng second supplier para sa Combat Management Systems (CMS) ng dalawang warship.
Nangako naman si Go na makikipagtulungan siya sa isasagawang pagsisiyasat, dahil wala naman aniya siyang itinatago sa isyu.