Passport backlog dahil sa problema sa security paper
Nahaharap ngayon sa seryosong problema ang pribadong kumpanya na gumagawa ng Philippine passports, sa supply ng security paper nito na pinaniniwalaang sanhi ng paglala ng passport backlog.
Sinusuri ng House Committees on Foreign Affairs at Good Government ang nasabing impormasyon sa kabila ng babala ng kumokondenang mambabatas na ang pagbabago sa security features ng pasaporte ay posibleng sanhi ng kanselasyon ng P38-bilyon kontrata sa pagitan ng APO Production Unit Inc. ng gobyerno, at ng United Graphic Expression Corp (UGEC), isang pribadong kumpanya.
Nagsasagawa ang House panel ng congressional investigation sa naturang kontrobersiya sa pasaporte at tinitingnan kung ang UGEC ang inatasang magimprenta ng furnished information ng 3.4 milyong pasaporte kada taon, na hindi na gumagamit ng abaca component para sa security paper.
Ayon sa report,nauubusan na rin ang UGEC ng supply ng papel kaya bumabagal ang paggawa ng pasaporte na umabot lang ng 1,946,703 noong Marso 2017.
“The removal of the abaca material is not only a possible contractual violation but may also compromise the security and reliability of UGEC-printed passports,” sabi ni Bayan Muna Rep. Carlos Isagani Zarate.
Sa pahayag ni Asst. Minority Leader at ABS Party-list Rep. Eugene De Vera, nasa probisyon para sa printing contract at delivery ng passport ang abaca component, at kung wala ang nasabing material ay magiging void o maaaring kanselahin ang kontrata.
Sinasabing kumukuha ng supply ng security paper ang UGEC mula sa isang supplier sa Slovenia.
Ang grupo ng mambabatas umano ang nagbigay ng go signal para sa UGEC na kumuha sa Slovenia supplier matapos silang magsagawa ng ocular visit sa tanggapan ng European firm.
Nitong nakaraang linggo, nagsagawa ng foreign affairs committee ng closed door hearing kaugnay sa passport inquiry.