Pera ng taxpayers ayaw masayang sa kawo-walkout
Nilinaw kahapon ng Malacañang na ayaw lamang ni Pangulong Rodrigo Duterte na “masayang ang pera ng taxpayers” sa mga militanteng estudyante ng University of the Philippines (UP) na pinagbantaan ng Presidente na sisipain sa unibersidad dahil sa madalas na pagwowalkout laban sa pamahalaan.
Sinabi ng Pangulo na ibibigay niya ang mga slot ng mga nagwo-walkout na UP-Diliman students sa mga karapatdapat at matatalinong Lumad, dahil sa laging pagliban sa klase upang magprotesta sa kalsada, sa layuning mapabagsak ang US-Duterte regime.
Binigyang-diin naman ni Presidential Spokesperson Harry Roque na hindi layunin ng pangulo na sikilin ang karapatan ng mga Pinoy sa malayang pagpapahayag.
“Malinaw po ang sabi ni Presidente, ang tinututulan niya iyong walkout sa klase. Hindi po niya sinusupil ang karapatan ng malayang pananalita at tsaka ng karapatan ng peaceful assembly. Puwede pong gawin ‘yan ng mga estudyante, ang tinututulan niya iyong walkout,” paglilinaw ni Roque.
Nais lamang, aniya, ng Presidente na hindi masayang ng mga estudyante ang pera ng mga nagbabayad ng buwis, dahil sa madalas na hindi pumapasok sa klase ang mga ito.
Aniya, first time itong mangyari na babayaran ng gobyerno ang matrikula ng mga estudyante sa lahat ng state at local universities and colleges (SUCs at LUCs), hindi lamang sa UP.
“Iyong mga Lumads po, kinakailangang mag-apply sa UP bago sila matanggap. Pero I’m sure po, pupuwedeng magkaroon naman ng pamamaraan sa UP na bigyan ng prayoridad iyong mga Lumad communities. So, kung i-implement po ‘yan ng Presidente, I’m sure magkakaroon po ng ugnayan doon sa administration ng UP,” sabi pa ni Roque.
Sa speech engagement ng pangulo sa Indigenous Peoples’ Leaders Summit sa Davao nitong Huwebes, tiniyak niyang magkakaroon ng lugar sa UP ang mga Lumad, kapalit ng mga militanteng estudyante.
“UP? Gusto silang mag-walkout? I encourage them. You do not go to school anymore. Stay in the streets. Go ahead, I will get new ones. I will put them (mga Lumad) there,” sabi ni Duterte.