13 nasagip sa ‘human trafficker’

Binalaan ni Department of Justice (DoJ) Secretary Vitaliano Aguirre II ang mga human trafficker na hahabulin sila ng pamahalaan, kasunod ng pagkakadakip sa isang hinihinalang human trafficker at pagkaka-rescue sa 13 umano’y biktima nito.

Ang babala ng kalihim ay kasunod ng pagkakaaresto kay Shiela Estueta, 45, nakatira sa Buklod Nayon, Caloocan City.

Nasagip din ng mga awtoridad ang 13 biktima mula sa kamay ng suspek, at nasa kustodiya na ngayon ng overseas welfare group na Advocates and Keepers Organizations of Overseas Filipino Workers (AKOOFW), ayon sa kalihim.

“May this serve as a warning for other human trafficking predators who take advantage of the vulnerabilities of our fellowmen, the government will get you,”ani Aguirre.

Nabatid na nadakip si Estueta ng mga tauhan ng National Bureau of Investigation-Anti-Human Trafficking Division (NBI-AHTRAD) sa entrapment operation sa Ninoy Aquino International Airport (NAIA) nitong Enero 21.

Nabatid na kasama rin sa operasyon ang Bureau of Immigration (BI) at ang Inter- Agency Council Against Trafficking (IACAT), na pinamumunuuan din ni Aguirre.

Sinabi ng kalihim na si Estueta ay miyembro ng sindikato na target ang mga Pilipinong nangangailangan ng trabaho sa ibang bansa.

Nauna nang nangako ang Department of Labor and Employment (DoLE) na magbibigay ng tulong pinansiyal sa 13 nasagip na biktima, kaugnay ng “Balik-Pinas, Balik-Hanapbuhay Program” ng Overseas Workers Welfare Association (OWWA).