Resolusyon sa ‘Atio’ case, ilalabas ngayong buwan

Umaasa ang Department of Justice ( DoJ) na mailalabas sa kalagitnaan ng Pebrero ang resolusyon kaugnay ng preliminary investigation na isinagawa sa kaso ng pagkamatay ng hazing victim na si Horacio Tomas “Atio” Castillo III.

Ipinaalam na kay DoJ Secretary Vitaliano Aguirre II ng tatlong panel prosecutor, sa pangunguna ni Assistant State Prosecutor Susan Villanueva, na tapos na ang kanilang preliminary investigation sa naturang kaso.

“The Prosecution Panel is presently evaluating all of the evidence submitted and shall endeavour to come up with a resolution by midFebruary 2018,” saad sa report ng panel kay Aguirre.

Bukod kay Villanueva, binubuo rin ang panel nina Prosecution Attorneys Wendell Bendoval at Honey Rose Delgado.

Enero 22 natapos ng panel ang preliminary investigation at idineklara ang kaso para sa pagsusumite ng resolusyon.

Ibinatay ang preliminary investigation ng panel sa inihaing reklamo ng Manila Police District (MPD) at ng mga magulang ni Atio na sina Horacio Jr. at Carminia.

Tinukoy ng MPD ang 18 suspek na kinasuhan ng murder, robbery, at paglabag sa Republic Act 8049 o AntiHazing Law.

Habang 31 naman ang inireklamo ng mga magulang ni Atio sa kaparehong mga kaso.

Bukod pa rito ang paghahain ng mag-asawa ng apat na bilang ng perjury at obstruction of justice laban sa 23 pang respondent.