Ex-TESDA official, misis 10 taong kalaboso sa graft

Anim hanggang 10 taong pagkabilanggo ang inihatol ng Sandiganbayan laban sa dating provincial director ng Technical Education and Skills Development Authority (TESDA)-Aklan na si Edwin Villanueva at misis nito matapos mapatunayang nagsabwatan sa pagkakamal ng pera.

Guilty si Villanueva at asawang si Nida sa paglabag sa Section 3(d) ng Anti-Graft and Corruption Practices Act o Republic Act No. 3019, kaya hindi na rin maaaring humawak ang mga ito ng ano mang posisyon sa pamahalaan.

Base sa record ng korte noong Setyembre 2010, tinanggap ni Nida ang trabaho bilang in-house competency assessor ng Rayborn-Agzam Center (RACE), isang private competency assessment center na may nakabinbing official business sa TESDA sa Aklan.

Sa pagsusuri sa articles of incorporation, natuklasang miyembro ng board of directors ng RACE si Nida.

Inakusahan naman si Edwin ng pagbibigay ng accreditation sa RACE bilang isa sa mga training agency ng TESDA, na ang misis nitong si Nida ang nagsilbing RACE In-House Assessor for Food and Beverages Service NC II, at tumanggap ng P1,000 honorarium kada buwan.

In-appoint ni Edwin ang asawa bilang competency assessor ng TESDA para sa RACE simula Hulyo hanggang Oktubre 2011, at tumangap ng P250 bayad sa bawat kandidatong inaasistehan nito.

Samantala, ibinasura ng Sandiganbayan ang depensa ni Edwin na wala siyang alam sa pagiging empleyado ng kanyang asawa.