Hamon ni Marcos kay Robredo ‘bluff’ lang –Macalintal

Patuloy na nagtuturuan ang kampo ni Vice President Leni Robredo at ng kanyang karibal na si dating senador Ferdinand Marcos Jr. kaugnay sa recount ng mga balota.

Sinabi ni Romulo Macalintal, abogado ni Robredo, na ang hamon ni Marcos sa Vice President na iurong ang lahat ng kanilang mosyon sa Presidential Electoral Tribunal ay “bluff” at “diversionary tactic” lamang.

Pinanindigan ng beteranong abogado na walang nakabiting mosyon si Robredo sa Supreme Court, na tumatayo bilang PET.

“His challenge is actually a clear manifestation that he regrets and lacks confidence in the would be results of the recount,” ani Macalintal sa isang pahayag.

“It is his diversionary tactic to avoid the great embarrassment and humiliation he would suffer once the people know that Marcos’ claimed bombshell of evidence would turn out to be a dud,” dagdag niya.

Kumpiyansa at nakatitiyak siya na hindi babaguhin ng vote recount ang resulta ng 2016 vice presidential race.

Isinantabi naman ng isa pang abogado ni Robredo na si Maria Bernadette Sardillo, ang posibilidad ng paglalagda sa joint motion kasama si Marcos o pag-urong sa lahat ng kanilang mosyon sa PET.

Ayon kay Sardillo, si Marcos ang naghain ng “frivolous motions after the other to no end but delay the case.”

Ayon sa tagapagsalita ni Marcos, ang abogadong si Vic Rodriguez, umaasa silang lalagda si Robredo sa joint motion na mag-uurong sa lahat ng outstanding motions para makadiretso na sa recount.

“The ballots are the best evidence and we should just proceed with the recount,” aniya.

Ngunit ayon kay Sardillo ang hamon ni Marcos para iurong nila ang kanilang mosyon ay “pure PR” lamang.

Inaakusahan ni Marcos si Robredo ng pandaraya sa vice presidential race matapos siyang matalo sa 260,000 sa boto.

Paulit-ulit na itinatanggi ni Robredo ang mga alegasyon.