Lady Gaga, kinansela ang 10 European shows
DAHIL sa malubhang sakit ay napilitan si Lady Gaga na kanselahin ang sampung show sa European leg ng kanyang Joanne concert tour. Sinabi ng singer at ng kanyang team nitong Sabado, ilang buwan niyang ipagpapaliban ang mga pagtatanghal sa Europe dahil sa iniindang karamdaman.
Nauna nang sinabi ni Lady Gaga, na ang ilan sa mga pinasikat na awitin ay ang Bad
Romance at Born This Way, na mayroon siyang fibromyalgia, isang musculoskeletal pain disorder na madalas na may kasamang pagkahapo at cognitive difficulties.
Sa pahayag na ipinaskil sa Twitter at Instagram pages ni Lady Gaga ay hindi binanggit ang fibromyalgia ngunit sinabing nagpasya ang 31-anyos na singer na kanselahin ang shows matapos konsultahin ang kanyang medical team.
“Unfortunately, Lady Gaga is suffering from severe pain that has materially impacted her ability to perform live,” saad sa pahayag. Sa kasamang statement sa social media, sinabi ni Lady Gaga labis niyang ikinalulungkot ang pagkansela sa shows, na kabibilangan ng mga pagtatanghal sa London, Zurich, Stockholm, Paris at Berlin. “I promise I will be back in your city, but for now, I need to put myself and my well- being first,” aniya. Ang Joanne tour, ipinangalan sa rock-style album ng singer na inilabas noong 2016, ay itinataguyod ng Live Nation Entertainment Inc. Nagsimula siyang magtour noong Agosto 1 sa Vancouver, Canada, ang una sa mahigit 40 shows niya sa North America. Noong Setyembre, sinabi ni Lady Gaga na dahil sa matinding kirot, kinailangan niyang ipagpaliban ang European leg ng tour, na orihinal na itinakda noong Setyembre 21 sa Barcelona, Spain. Nang panahong iyon, nag-post siya ng mga litrato sa online na nakahiga sa ospital at may drip sa kamay. Ang European shows ay inireschedule sa unang bahagi ng taong ito.
Noong Enero 14, nagtanghal si Lady Gaga sa Barcelona at nagpatuloy sa Italy, Netherlands at Germany. Ang huling concert niya ay nitong Huwebes ng gabi sa Birmingham, England.
Si Lady Gaga ay pang-14 sa listahan ng top-grossing concert tours of 2017 ng music industry trade publication na
Pollstar, na mayroong sales na umaabot sa $86 milyon mula sa kanyang shows sa North America.
Naospital ang singer noong 2013 dahil sa hip injury, at sa documentary na
Lady Gaga: Five Foot Two, ibinunyag niya ang kanyang struggles sa chronic pain.