Justin Timberlake balik sa Super Bowl halftime
NAG- SELFIE, nagbigay-pugay sa music legend na si Prince, at tiniyak ni Justin Timberlake na walang mangyayaring aberya sa kanyang halftime Super Bowl performance nitong Linggo, sa pagbabalik niya sa gig kung saan niya ipinakilala, at ni Janet Jackson, ang terminong “wardrobe malfunction” sa American lexicon.
Sumayaw at umawit si Justin sa halos 12minutong pagtatanghal sa harap ng television audience na tinatayang umabot sa mahigit 100 milyong katao. Pinaghalo niya ang awitin mula sa kanyang bagong album at mga naging tatak na niya gaya ng Can’t Stop the Feeling na nagpasikat sa kanya bilang solo artist.
Bilang homage sa anak ng Minneapolis na si Prince, pumanaw noong 2016, tumugtog si Justin sa puting piano at umupo sa ilalim ng projection ni Prince at inawit ang cover ng I Would Die 4 U.
Ang natatanging major piece of clothing na natanggal sa pagkakataong ito ay ang jacket ni Justin. Noong 2004, binulaga ang madla ng pagkapunit ng damit ni Janet sa halftime show sa Houston at lumitaw ang kanyang dibdib.
Ang insidente na pinamagatang “Nipplegate” ay isinisi sa wardrobe malfunction. Pinainit din nito ang Internet at ang tumambad na dibdib ni Janet ang naging most-searched image sa Internet history nang panahong iyon.
Sinabi ni Justin sa social media bago siya nagtanghal na hindi na niya makakasama sa Super Bowl stage si Janet.
Inako ni Janet ang buong pagkakamali sa insidente noong 2004, at ilang radio stations ang nag-boycott sa kanyang musika. Hindi naman gaanong naapektuhan ng nasabing insidente ang karera ni Justin.
Ilang oras bago ang laro, bumaha ang fans ni Janet sa social media at ginawang top trending sa U.S. Twitter ang #JanetJacksonAppreciationDay. Binaha ng mga tagasuporta ng singer ang social media platform sa mga mensahe ng appreciation para kay Janet, na bilang solo artist ay nakapagbenta ng mahigit doble sa records ni Justin, ayon sa Recording Industry Association of America data.