PAGDILA SA APOY
Ika-61 labas
KAHIT hindi araw ng panhik ng ligaw ni Renee, dumating ito kina Lagring.
“Kaya nga ako narito,” sabi ni Renee bilang sagot sa sabi ni Lagring: Alam mo na siguro ang nangyari sa akin. “Ibig ko kasing makipaglinawan. Mahirap naman ‘yong basta’t hindi na lang ako basta sisipot.”
“A-ano ang ibig mong sabihin, Renee?”
Inagaw ni Renee ang marahil ay iba pang sasabihin ni Lagring. “Imposible naman yatang walang mangyari sa inyo ng gagong ‘yon.”
“Ni-rape ako, Renee. Pinuwersa ako!”
“It doesn’t make any difference, di ba? Hindi na p’wedeng ibalik ng nangyari ang virginity mo!”
“Hindi ko ginusto ‘yon!” Sumisigaw na si Lagring.
“H’wag kang sumigaw.” Sumisigaw na rin si Renee.
“Bakulaw ka rin pala, demonyo ka!”
“Bakit pa nagpunta ako sa ganitong lugar na hindi na yata nararating ng Diyos kung luray na rin lang ang makukuha ko?”
“Impakto ka! Alam ko nang tinatalikuran mo na ‘ko!” “Very good. Ang dali mo naman palang makaintindi.” “Lumaya ka…layaasss!” “Ano pa nga ba ang gagawin ko dito?” Tatawatawang parang nakakainsultong tumayo si Renee. “Humpt! Sayang lang ang pagoda pera ko.”
Tuluyan nang umalis si Renee nang hindi nagpaalam sa kanyang mga magulang.
“Napaka-impakto mo talaga, Pedring!” Sumisigaw si Lagring habang nakadungaw sa bintana. “Kung hindi sa iyo…”
Kinabukasan, higit pa san a-tabloid ang nangyari kina Renee at Lagring. Ang unang pangyayari na may kinalaman kina Pedring at Lagring ay kumalat din pero palihim at waring nag-iingat ang mga daldalero at daldalera. Pero itong huli na may kinalaman kina Lagring at Renee ay talagang nabroadcast. Isigaw ba naman ni Lagring sa bintana, e.
Nang makarating kay Pedring ang balita tungkol sa nangyari kina Lagring at Renee ay labis siyang natuwa. Noong tandisang tanggihan siya ni Lagring tungkol sa alok niyang kasal, gumuho na sa kanya ang langit at lupa. Bakit pa niya ginawa kay Lagring ang nakakarimarim na kasalanang iyon kundi rin naman pala pakakasal sa kanya si Lagring? Mabuti pa nga siguro’y pinatay na siya ng ama ni Lagring kung ganitong hindi rin pala magiging kanya ang nobya.
Sa kanila ay may lumang kawikaan na hanggang sa ngayon ay mabisa at pinaniniwalaan. Kung saan nadapa, ay doon bumangon. Na ipinatutungkol sa isang dalaga. Dahil nga sa sobra pa ang pagpapahalaga ng mga babae sa dangal, kung sino ang lalaking nakalamang sa kanya, gusto man niya o ayaw sa lalaking iyon, mapipilitang pakasal doon ang naturang nalamang ang dalaga.
Dalawang pagkakataon itinuturing na nadapa ang isang babae. Una ay kung napugayan ng dangal ang isang babae sa harap ng maraming tao. Halimbawa’y niyakap, pinaghahalikan o kaya’y pinaghihipuan ng isang lalaki ang isang babae sa harap ng madla. Ikalawa ay kung naitanan o nagahasa ng isang lalaki ang isang babae sikreto man o hayag. Sa dalawang pagkakataon, kailangang itayo ng lalaki ang dangal ng babae sa pamamagitan ng kasal. Ito ang sinasabing kung saan nadapa ay doon bumangon. Kaya nga may tinatawag ding ang hindi makuha sa santong dasalan ay puwedeng daanin sa santong paspasan. Na ang simpleng kahulugan lang naman…kung hindi makuha sa ayos na panliligaw ay pwedeng maresolba sa panghahalay o pamumuwersa. Itutuloy...