PNP, absuwelto sa ‘STL bribe’ - Balutan
PINASINUNGALINGAN ni Philippine Charity Sweepstakes Office (PCSO) General Manager Alexander Balutan nitong Lunes ang pag-uugnay sa Philippine National Police (PNP) na tumatanggap ng lagay mula sa Small Town Lottery (STL).
Sinabi ni Balutan na may nilagdaang Memorandum of Agreement (MOA) ang PCSO at PNP para magsagawa ng mga operasyon na magpapatigil sa operasyon ng mga ilegal na mga pasugalan tulad ng ‘jueteng’.
Batay umano ito sa inilabas na Executive Order No. 1 ng Pangulong Rodrigo Duterte para magsagawa ng all-out war laban sa ilegal na pasugalan.
Kamakailan, ipinahayag ni gambling operator Charlie “Atong” Ang na tumatanggap umano ng lagay ang PNP mula sa mga STL operators.
Ikinadismaya ni PNP Chief Ronald “Bato” dela Rosa ang pahayag ni Ang na kasalukuyan dawit sa kontrobersya na ipinalutang ni PCSO Board member Sandra Cam laban sa mga opisyal ng ahensiya kabilang si Balutan.
“Baka sanay sya sa bribery dahil dati siyang gambling lord din siya ‘di ba?” naibulalas ni Dela Rosa.
Inamin naman ni Dela Rosa na kabilang ang PNP sa nabibigyan ng ayuda mula sa kinikita ng STL na aniya;y ginagamit nila para sa mga operasyon laban sa ilegal na pasugalan.
“All funds received by the PNP are all accounted for,” pahayag ni Dela Rosa.
Naitala ng STL ang kasaysayan sa kinitang P15.7bilyon sa nakalipas na taon (P1.3 bilyon kada buwan). Mas malaki ito sa P4.7 bilyon na kinita ng ahensiya sa nakalipas na mga taon.
Mula sa P1.12 bilyon STL shares, ibinigay ng PCSO ang P314.9 milyon sa Philippine National Police, P78.7 milyon sa Criminal Investigation and Detection Group (CIDG), P472.4 milyon sa pamahalaang lungsod at munisipyo, P103.7 milyon sa Congressional District, at P150.3 milyon sa probinsiya.
Nilinaw ni Balutan na walang kapangyarihan ang PCSO para labanan ang mga operasyon ng mga sindikato sa likod ng ilegal na pasugalan kung kaya’t hininigi nila ang tulong ng PNP.
“We have no law enforcement power to police, arrest, and apprehend illegal gamblers/operators. Mas maganda nga kung meron kami nun eh,” pahayag ni Balutan.