Dengvaxia victims ipasusuri sa foreign forensic expert

Nais ni Department of Justice (DoJ) Secretary Vitaliano Aguirre II na kumuha ng clinical pathologist na susuri sa bangkay ng mga batang namatay matapos maturukan ng Dengvaxia.

Iginiit ni Aguirre na ang kukuhaning clinical pathologist ay dapat na manggaling sa ibang bansa, at hindi isang Pilipino, at dapat na walang kinikilingan, kuwalipikado at bihasa.

Mahalaga, aniya, ang magiging opinyon ng clinical pathologist para matukoy kung may koneksiyon nga ba ang Dengvaxia vaccines sa pagkamatay ng mga bata.

Aprubado na, aniya, ni Health Secretary Francisco Duque ang magiging hakbang nito na muling hukayin at isailalim sa pagsusuri ang tissues at internal organs ng mga labi ng mga bata.

Nanindigan si Aguirre na hindi maituturing na expert opinion ang naging pahayag ni Dr. Erwin Erfe, forensic laboratory director ng Public Attorney’s Office (PAO), dahil hindi umano ito pathologist kundi isang medico-legal officer.

Sinabi ng kalihim na ikokonsulta niya ang mungkahing kumuha ng clinical pathologist sa muling pagpupulong nila bukas sa Malacañang, kasama sina Duque, PAO Chief Percida Acosta at Presidential Spokesperson Harry Roque.

Pananagutin naman ng Department of Health (DoH) ang mga pagamutan na maniningil sa mga batang isusugod sa kanilang ospital matapos mabakunahan ng Dengvaxia.

Ito ang tiniyak ni Undersecretary Ma. Francia Lacsamana makaraang harapin at makipag-usap sa mga magulang na nangalampag sa tanggapan ng DoH sa Sta. Cruz, Manila kahapon ng umaga.

Gayunman, nilinaw ni Lacsamana na ang tanging saklaw ng libreng pagpapagamot ay ang mga batang nasa master list ng mga nabakunahan ng Dengvaxia.