R7- M cash, alahas natangay sa doktora
Sinisiyasat ng awtoridad kung biktima ng Dugo-Dugo gang o pinagnakawan ng sariling kasambahay ang isang doktora, na natangayan ng halos P7 milyon halaga ng pera at alahas sa loob ng kanyang bahay sa Pasig City, nitong Martes ng hapon.
Nakadetine at iniimbestigahan ng awtoridad ang itinuturong suspek na si Shelamy Layno, nasa hustong gulang, at kasambahay ng 57-anyos na doktorang ayaw magpabanggit ng pangalan, at taga-Barangay Pineda.
Sa imbestigasyon ni SPO1 Rodelio Olalia, ng Pasig City Police, dakong 4: 30 ng hapon nang madiskubre ng biktima na nadistrongka ang mga drawer ng cabinet sa kanyang kuwarto at nawawala na ang kanyang P500,000 at US$35,000 cash, gayundin ang kanyang mga mamahaling alahas, na aabot sa P4.5 milyon.
Kauuwi lang ng doktora sa bahay nang napansing wala rin ang kasambahay na si Layno kaya tinangka niya itong tawagan sa cell phone, subalit hindi niya nakontak.
Bandang 8: 00 ng gabi nang umuwi si Layno na agad kinumpronta ng kanyang amo at ikinatwiran ng kasambahay na nakatanggap siya ng tawag mula sa isang lalaki at isang babae, na nagsasabing nasangkot ang doktor sa isang vehicular accident sa isang lugar sa Quezon City.
Inutusan umano siya ng callers na sirain ang mga drawer at kunin ang mga pera at alahas ng doktora, bago inihatid sa isang hindi kilalang babae sa loob ng mall sa North EDSA, na karaniwang modus operandi ng mga miyembro ng Dugo-Dugo gang.
Nagduda ang doktora sa pahayag ng kasambahay, at ipinaaresto ito sa mga pulis para sampahan ng qualified theft.