2 Criminology students, laglag sa snatching
Kalaboso ang inabot ng dalawang Criminology student matapos makuhanan sa closed circuit television (CCTV) camera ang panghahablot umano nila sa cell phone ng 15-anyos na estudyante sa Quiapo, Maynila, nitong Martes ng hapon.
Nahaharap sa kasong robbery snatching, na may kaugnayan sa paglabag sa Anti-Child Abuse Law (RA 7610), sina Jerickson Sajul, 20, nakatira sa Sta. Cruz; at Helmer Caspe, 19, ng M. Dela Fuente St., Sampaloc, kapwa estudyante ng University of Manila (UM), na kumukuha ng kursong Criminology.
Inireklamo sila ng 15-anyos na biktimang estudyante sa Grade 8, matapos umano nilang hablutin ang rose gold na Oppo A37F cell phone nito na nagkakahalaga ng P7,000.
Sa imbestigasyon ni PO1 Debby Ann Respicio, ng Manila Police District (MPD)-Station 3, dakong 4:30 ng hapon nang mangyari ang insidente sa Legarda St., Quiapo habang nag-aabang ng masasakyang jeep ang biktima.
Biglang tumunog ang cell phone ng biktima kaya agad niyang inilabas, pero hinablot umano ito ng dalawang suspek na magkaangkas sa motorsiklo, bago tumakas.
Sa tulong na impormasyon mula sa concerned citizen at Facebook post, nadakip sa follow-up operation ng mga tauhan ng Barbosa Police Community Precinct (PCP) ang dalawang suspek na hindi na nagawang pumalag at itanggi ang nagawang krimen dahil sa CCTV footage.
Sa pulisya, inamin umano ni Sajul na siya ang humablot sa cell phone ng biktima dahil kailangan niya ng perang pambayad sa eskuwelahan.
Iginiit naman ni Caspe na nadamay lang siya sa krimen at hindi niya batid ang ginawang krimen ng kanyang kaklase.