Canada pinarerepaso ang helicopter deal sa PH

OTTAWA (REUTERS) – Isang araw lamang matapos lagdaan ang $233 milyon kasunduan para magbenta ng 16 na helicopter sa Pilipinas, ipinagutos ang gobyerno ng Canada nitong Miyerkules ang pagrerepaso sa kasunduan sa gitna ng mga pangamba na posible itong gamitin laban sa mga rebelde.

Sinabi ni Trade Minister Francois-Philippe Champagne na ang deal – pormal na nilagdaan nitong Martes – ay napagkasunduan noong 2012 sa unawaan na gagamitin ang helicopters para sa search-and-rescue missions.

Sinabi ni Major-General Restituto Padilla, deputy chief of staff for plans and programs ng Armed Forces of the Philippines (AFP), nitong Martes na gagamitin ang helicopters para sa internal security operations ng militar, idinagdag na maaari rin itong ipadala sa search-and-rescue at disaster relief operations.

“When we saw that declaration ... we immediately launched a review with the relevant authorities. And we will obviously review the facts and take the right decision,” ani Champagne sa reporters, nang hindi nagbibigay ng mga detalye.

Ang Bell 412EPI helicopters ay nakatakdang i-deliver sa unang bahagi ng susunod na taon habang naghahanda ang AFP na paigtingin ang mga operasyon laban sa Islamist at komunistang rebelde.

Tinanong si Prime Minister Justin Trudeau, kung nababahala siya na maaaring gamitin ang helicopters laban sa Filipino citizens, sumagot siya na “Absolutely.”

Malinaw ang mga regulasyon ng Canada sa pagbebentahan nila ng mga armas at kung paano gagamitin ang mga ito, sinabi niya sa question and answer event sa University of Chicago.

“We are going to make sure before this deal or any other deal goes through that we are abiding by the rules ... that Canadian governments have to follow,” aniya.

Inakusahan ng human-rights at arms-control groups ang sandatahang lakas ng Pilipinas ng extrajudicial killings, torture at iba pang kalupitan habang nilalabanan ang Islamic militants sa Mindanao at mga komunistang rebelde sa ibang ibang bahagi ng bansa.

May polisiya ang Canada na hindi maaaring magbenta ng military equipment na posibleng magamit sa pang-aabuso sa mga karapatang pantao.

SA IBA NA LANG

Maaari namang sa ibang bansa na lamang bumili ng military aircraft ang Pilipinas sakaling tumanggi na ang Canada na magbenta ng kanilang helicopters sa bansa, sinabi ng Malacañang kahapon.

“If they don’t want to sell, well we may consider the prospect of procuring them from other sources,” sinabi ni Presidential spokesman Harry Roque sa press briefing sa Palasyo.

Pinasinungalingan din ni Roque ang mga espekulasyon na ang helicopters na bibilhin mula sa Canada ay gagamitin bilang attack aircraft laban sa mga rebelde. Tiniyak niya na ang utility aircraft ay gagamitin lamang para sa humanitarian missions.

“Malinaw po ang dahilan kung bakit natin gustong bumili ng Bell helicopters. Ito po ay gagamitin para transportasyon ng personnel, supplies, humanitarian missions, ferrying of wounded and injured soldiers and other forms of humanitarian assistance and disaster response,” diin niya.